Qala bıligi merziminde oryndalmaǵan, ıakı standarttardy saqtamaıtyn, óz mindetin oryndamaıtyn kompanııalardy jumysqa aralastyrmaýdy kózdep otyr. Baqylaýdy kúsheıtýmen qatar, respýblıka deńgeıinde satyp alý erejelerine ózgerister engizildi, bul kezdeısoq kompanııalardy tenderge jolatpaýǵa septigin tıgizbek. Sonymen qatar, senimsiz jetkizýshilerge aıyppul salyp, shekteýdi qatańdatýdy kózdeıtin usynys jasap jatyr. О́ńirlik kommýnıkasııalar qyzmetindegi baspasóz máslıhatynda osyndaı oı aıtyldy.
«Biz adal bızneske barynsha jaǵdaıdy jasaımyz. Almatyda adal merdigerler jumys isteýi kerek. Mindettemesin merzimi, sapasy jaǵynan bolsyn, mejeli ýaqytynda oryndamaıtyn kez kelgen kompanııany qoshtamaımyz. Aqsha taýyp, jumysyna júrdim-bardym qaraıtyn merdigerler bul jerde tabys taba almaıdy. Olarǵa talap kúsheıedi. Biraq adal bıznesti biz árdaıym qoldaımyz», — dedi qala ákiminiń orynbasary Oljas Smaǵulov.
Bıylǵy 9 aıda Almatyda Biryńǵaı satyp alýlardy uıymdastyrýshy jalpy somasy 752,6 mıllıard teńgege 1 274 baıqaý ótkizgen. Onyń 491 mıllıard teńgesi qurylys pen ınfraqurylymdyq jumystarǵa tıesili. Biraq merdigerdiń keıbiri isti ıgere almaı, tapsyrysty úshinshi bireýge ótkizip, jumysqa kesirin tıgizgen. Bılik mundaı kompanııalardyń bolashaqtaǵy baıqaýǵa qatysýyna shekteý qoıyp, baqylaýdy kúsheıte túspek.
«Bıyl bizdi mindetin durys oryndamaǵan merdigerler biraz áýreledi. Buǵan tenderde kompanııalardyń jalpy tájirıbesi eskerilip, nysannyń kúrdeliligin saralamaǵany sebep bolǵan. Buryn shaǵyn jumys istegen kompanııalar úlken jobalardy jeńip aldy. Mınıstrlik keıin erejege ózgeris engizdi: endi tájirıbege saralanǵan tásil qoldanylyp, memlekettik satyp alýǵa qatysýy naqty eskeriletin bolady», — dedi Memlekettik aktıvter basqarmasynyń basshysy Erkinbek Ámirǵalıev.
Osy oraıda Almaty qalasy Qarjy mınıstrligine tómendegideı usynystaryn bildirdi.
Qurylys jumysy boıynsha avanstyq tólemdi tapsyrys berýshiniń quqyǵy retinde qarastyrý (qazirgi kezde bul mindetti shart),
Senimsiz jetkizýshiniń tiziminde bolýdy 2 jyldan 3 jylǵa deıin uzartý.
Oǵan qosa qazirgi kezde aıyppul kólemi tek 0,01% bolǵandyqtan, bul tıimsizdeý bolyp tur. Sondyqtan Almaty bıligi ony shart somasynyń 25%-ǵa deıin ulǵaıtýdy oılastyryp otyr.
«Bıýdjettiń ár teńgesi tıimdi jumsalýy tıis, bul qaǵıda Almatyda naqty jumys istep tur», - deıdi ákimdik ókilderi.
