Áýlettiń ustazdyq shejiresi áke men ananyń ónegesinen bastaý alady. Ahmetovter áýletiniń kelini Raýshan Embergen 1975 jyly Qaratal aýdany Kópbirlik aýylyndaǵy A.Baıtursynuly atyndaǵy orta mektepte alǵashqy sabaǵyn berip, keıin Baıshegir aýylyndaǵy Abaı atyndaǵy mektepte 50 jylǵa jýyq bastaýysh synyp muǵalimi bolyp eńbek etken. Onyń meıirimi men ustazdyq sheberligi talaı janǵa shabyt berdi. Zeınetke shyqsa da izgilikti isi shákirtteriniń júreginen óshken emes. Búginde sol sara jolmen qyzy Bıbigúl Ahmetova júrip keledi. Ol 2005 jyly Taldyqorǵan qalasyndaǵy №4 mektepte muǵalim bolyp eńbek jolyn bastap, búginde Jetisý oblystyq ádistemelik ortalyǵynda mektepke deıingi jáne bastaýysh bilim berý bólimin basqaryp otyr. Onyń kásibine degen adaldyǵy – áýlet tarıhynyń jalǵasty bir paraǵy.
«Ustazdyq joldy tańdaý men úshin kezdeısoq sheshim bolǵan joq. Áke-sheshemizdiń ómiri bizge baǵyt-baǵdar boldy. Bala kúnimizden olardyń shákirtke degen meıirimin, bilimge degen qurmetin kórip óstik. Sondyqtan bul mamandyq – tek kásip emes, bizdiń áýlet úshin qasıetti murat. Ár býyn kelesi býynǵa osy senimdi amanat etip tapsyryp otyr. Bul dástúrdi jalǵastyrý – bizdiń paryzymyz», deıdi B.Ahmetova.
Ahmetovter áýletinde ustazdyq bir ǵana býynmen shektelmeıdi. Nemeresi Nazerke Rysbekqyzy da 2018 jyldan bastap Taldyqorǵan qalasyndaǵy №17 mektepte pedagog-defektolog bolyp qyzmet etedi. Bul – búgingi qoǵam úshin asa qajetti mamandyq. Onyń kúıeýi Azat Beısenbekov – dene shynyqtyrý pániniń muǵalimi. Jas urpaqty salamatty ómir saltyna baýlyp júr.
Sýretti túsirgen – Jumabaı Musabek
Taǵy bir nemeresi Erasyl men kelini Aıkúmis Qaratal aýdany Baıshegir aýylyndaǵy Abaı atyndaǵy orta mektebinde jumys isteıdi. Jas otbasy balalarǵa sapaly bilim men taǵylymdy tárbıe berý jolynda kúsh biriktirgen. Oǵan qosa, ápkeleri Baqytbala men Janarkúl de ustazdyqty serik etken jandar. Biri – balabaqsha tárbıeshisi, biri – bastaýysh synyp muǵalimi. Olardyń balalarǵa degen ystyq yqylasy men eńbekqorlyǵy áriptesteri men ata-analar tarapynan joǵary baǵalanǵan.
«Men úshin ustaz bolý – ata-anamnyń jolyn jalǵaý ǵana emes, bolashaqqa senim syılaý. Balamen jumys isteý – úlken jaýapkershilik. Árbir shákirttiń júregine jylý syılap, onyń bolashaqqa qadam basýyna kómektesý – eń úlken qýanysh. Áýletimizdiń ustazdyq dástúrin jalǵastyryp otyrǵanyma maqtanamyn», deıdi Nazerke Rysbekqyzy.
Áýlettiń naǵashylary da – Omarovtar áýleti de úlken pedagogter dınastııasy. Tóleýqasen Omarov pen jary Kúlásh Esteýqyzy – ómirin bilim salasyna arnaǵan tulǵalar. Olar Qarataldaǵy Balqash mektebinde matematıka men fızıkadan sabaq bergen. Tóleýqasen Omaruly dırektorlyqqa deıin kóterilip, «Qazaq KSR halyq aǵartý isiniń ozyq qyzmetkeri» atandy. Eńbek jolynda kóptegen marapatqa ıe bolyp, ulaǵatty ustaz atandy.
«Olardyń shańyraǵy tek bilim oshaǵy ǵana emes, qazaq zııalylarynyń bas qosar ordasyna aınaldy. Jazýshy Kemel Toqaev pen teatr tarlany Qanabek Baıseıitov syndy tulǵalar da sol shańyraqta qonaq bolǵan eken. Ony jıeni B.Ahmetova bylaısha eske alady:
«1972 jyly qys mezgilinde naǵashymnyń úıine jazýshy Kemel Toqaev pen Bek Toǵysbaev keledi. Qonaqtardyń qasynda Qanabek Baıseıitov aǵamyz da bar. Bir qyzyǵy, ol kezde barlyǵy «Juldyz» jýrnalyn úzbeı oqıtyn, al jýrnalda qazaq aqyn-jazýshylarynyń jańa shyǵarmalary jıi jarııalanyp turady. K.Toqaevtyń shytyrman oqıǵaly «Túnde atylǵan oq» povesin bir demmen oqyp shyqtyq. Sol jyly taǵy «Sarǵabanda bolǵan oqıǵa» povesi jarııalandy. Sol kezde aýyl jastary jazýshymen tildesip, qoltańbamen kitaptaryn alyp, erekshe qýandy. Kemel Toqaevtyń júzi jyly, jaısań bolǵanyn, balalardyń basynan sıpap qoshtasqanyn naǵashymnyń jubaıy jıi aıtyp otyratyn».
Ahmetovter men Omarovtar áýletin qosqanda búginde 35 pedagog eńbek etip júr. Onyń ishinde 10 bastaýysh synyp muǵalimi bar. Olar tek sabaq berip qana qoımaı, shákirtterin shyǵarmashylyqqa jeteleıdi. Bul áýlet úshin ustazdyq – jaı ǵana kásip emes, ómirlik murat. Olar bilimmen birge adamgershilikti, eńbekqorlyqty da shákirt júregine sińirýdi paryz sanaıdy. Ahmetovter áýleti – naǵyz ustazdyq dınastııa, urpaqtan-urpaqqa bilim shýaǵyn shashyp kele jatqan abyroıly áýlet.
Jetisý oblysy
