Jańashyl jobanyń avtory, ulttyq sport janashyry, belgili prodıýser Qaısar Seıpishov bul ıgi ıdeıany biraz ýaqyt oıynda pisirip, jobasyn jasap, Jańaarqa aýdanynyń qurmetti azamaty Qaırat Kópbaevqa usynady. «Eger elge tıer paıdasy bolsa, aıanbaımyn», degen biraýyz sózinen soń, aýqymdy is-sharaǵa Qaısar Amangeldiuly bilegin sybana kirisedi.
Qaırat Sovetulynyń buǵan deıin de eline qaraılasyp, aýylyna jaǵdaı jasap otyrǵanyn el-jurt jaqsy biledi. Týǵan aýylyna zamanaýı sport saraıyn saldyryp bergen. Qazir sonyń arqasynda aıadaı ǵana aýyldan birneshe Azııa chempıony shyqty. Týǵan eline qurmeti men qyzmetin tizip jatpaımyz. Osy joly da qaıyrymdylyq jobasyna 22 tý bıe soıyp berdi. Munymen qosa, kúzgi orda festıvaliniń shyǵynyn kóterdi.
Osylaısha, «Qaıratpen 50 qadam 100 mektep» jobasy el-elge, jer-jerge saýyn aıtty. Amangeldiniń ordasynda ótken kúzgi orda festıvali dúbirli toıǵa ulasty.
Ashylý saltanatynda Jańaarqa aýdanynyń bas ımamy Asqar Qýatbek Quran oqyp, oblystyń bas ımamy Beıbit Baqytjanuly el men jerdiń amandyǵyna duǵa baǵyshtady.
Kúzgi festıval Alashtyń ardakúreń aqyny Ǵalym Jaılybaı eldiń toıyna tartý retinde joldaǵan jomart júrek ıesi Qaırat Kópbaevqa arnaǵan jyrymen ashyldy.
Igi is-sharaǵa aýdan basshysy Qanat Qojyqaev, aýdandyq máslıhat tóraǵasy Iýrjan Bekqojın, «Amanat» partııasy Ulytaý oblystyq fılıalynyń atqarýshy hatshysy Erlan Myrzabekov, Ulytaý oblysy mádenıet basqarmasynyń basshysy Maǵjan Tabyldın, Túgisken aýylynyń qadirli aqsaqaly Rahymbaı Úmbetov izgi tilekterin joldap, uıymdastyrýshy Qaısar Seıpishov pen demeýshi Qaırat Kópbaevtyń ónegeli isine rızashylyqtaryn bildirdi.
Saltanatty ashylý rásiminde Astanadan arnaıy kelgen aqyn Aısholpan Tileýtaı toıǵa jyrymen shashý shashty. Jańashyl bastamany, el azamattarynyń aıryqsha isin arnaýyna arqaý etti. Arqany án men kúıge bólep júrgen Jańaarqa halyqtyq «Nazqońyr» ansambliniń ónerine el-jurttyń yqylasy erekshe boldy.
Áýeli jaqsy-jaısańdardyń ıyǵyna jabylǵan Jańaarqa shapanynyń rekordtar kitabyna ený rásimi ótti. Jańaarqalyq 17 ismer-tiginshiniń bir úlgidegi kók shapanyn kıgen 600-ge tarta el-jurt kópshiliktiń kózaıymyna aınalyp shyǵa keldi.
Qazaqstannyń KInES rekord kitabynyń redaksııasynan arnaıy kelgen ókil Baqytjan Sábıtuly barlyq aspan tústes shapandy baqylap, sanap, arnaıy tirkelgeni jóninde resmı málimdedi.
Rekordqa esimderi engenin rastaıtyn sertıfıkat Rymkesh Dúısenbaıqyzyna, Qalamqas Ashtaevaǵa, Elmıra Erjanovaǵa, Aıman Jaqypovaǵa, Jansaıa Tókenqyzyna, Maıra Máýlenqyzyna, Áıgerim Erkeshqyzyna, Nurbala Tólegenqyzyna, Gúlsim Qurmanǵalıqyzyna, Ásem Jahınaǵa, Ásem Saqtapbergenqyzyna, Marııamgúl Merekeqyzyna, Aınur Súgirovaǵa, Úmit Tókenqyzyna, Jansaıa Oljabaıqyzyna, Raýshan Ǵabdýllaqyzyna, Gúljanar Serikqyzyna, Janbota Asanovaǵa tabystaldy.
Dál osy bir mereıli mezetten soń Arqanyń serisi atanǵan Qaısar Seıpishov týǵan jerine tartý jasap, belgili sazger Danııar Saǵyntaevtyń ánine jazǵan «Túgiskenim» týyndysyn oryndady.
Irgeli sharýa qojalyǵyn basqaryp otyrǵan Qaırat Sovetuly bir úıir jylqy soıyp, jarııa zeket berdi. Qaıyrymdylyq is-sharasy basqa kásipkerlerge úlgi retinde uıymdastyryldy. О́ıtkeni 500 tabaq et múshelep tartyldy. 4,5 tonna et. Tipti josparlanǵan mejeden asyp, 510 tabaq et sanaldy. Arnaıy baqylaýshy komıssııamen birge halyq ta sanaqqa belsene qatysty. Bul mol et Jezqazǵan qalasynyń oblystyq balalar úıine, Marýa Qulysheva atyndaǵy arnaýly áleýmettik qyzmetterge muqtaj balalardy qoldaý ortalyǵyna, Ulytaý oblystyq Ana úıine, Ulytaý oblysynyń arnaýly áleýmettik qyzmetter qoldaý ortalyǵyna, turmystyq zorlyq qurbandaryn áleýmettik psıhologııalyq qoldaý ortalyǵyna, Qaraǵandydaǵy medreseler men Jańaarqa aýdanyndaǵy kolledj stýdentterine úlestirildi. Munymen qosa, aýdandaǵy 300-ge jýyq áleýmettik tizimdegi otbasylarǵa da berildi.
Rekordqa 500 tabaq ettiń engenin málimdegen resmı ókil Baqytjan Sábıtuly joba demeýshisi Qaırat Kópbaev pen Qaısar Amangeldiulyna sertıfıkat pen arnaıy syılyq tabystady. Munymen qosa, áleýmettik ortalyqtyń basshylary jobanyń demeýshisine, uıymdastyrýshysyna Alǵyshattaryn tartý etti.
«Buryn-sońdy qazaq dalasynda mundaı kólemde tabaq tartylyp, qaıyrymdylyqqa tartý etilmegen edi. Jańashyl Jańaarqa azamattary taǵy da rekord jańartty. Mundaı kólemde biregeı úlgidegi shapan kıip júrgen eldi de estimeppiz, soǵan kózimiz naqty jetti. Darqandyqtyń dara úlgisin kórdik», deıdi Baqytjan Sábıtuly.
Munymen qosa, festıval aıasynda aýdaryspaq pen dástúrli sadaq atýdan respýblıkalyq saıys ótken edi. Bul da dýmandy dúbirge bóledi. Jeńimpazdarǵa qomaqty qarjylaı syılyqtar tabystaldy.
«Qaıratpen 50 qadam, 100 mektep» jobasynyń taǵy bir ónegeli sharýasy – mektep oqýshylary arasynda aýyldy damytatyn úzdik jobalarǵa jarııalanǵan baıqaý. Bul baıqaý aımaqtyq deńgeıde uıymdastyryldy. Úzdik dep tanylǵan bıznes joba ıelerine aqshalaı sertıfıkat berilip, basqa da oqýshylardy yntalandyrdy.
Osylaısha, festıval sońy qazaq estradasynyń juldyzdary óner kórsetken gala-konsertpen túıindeldi.
Qysqasy, aspan tústes 600-ge jýyq shapan men bel qaıystyrar 510 tabaq et rekord retinde tirkelip, ulttyń rýhyn kótergendeı. Alys-jaqynnan kelgen meımandar mereıli mesenat Qaırat Kópbaev pen joba jetekshisi Qaısar Amangeldiulyna ǵalamat festıval men ǵajap joba úshin qaıyra-qaıyra rızashylyǵyn bildirdi.
Ulytaý oblysy,
Jańaarqa aýdany
