Bet álpetti tanıtyn kameralar

Memleket  basshysy Qasym-Jomart Toqaev bıylǵy Jol­daýynda elimiz aldaǵy úsh jyl ishinde mindetti túrde jappaı sıfr­lyq el bolýy kerek degen min­det qoıǵany málim. Atalǵan tap­syrma aıasynda Ertis-Baıan óńiri­niń qoǵamdyq qaýipsizdikti qamtamasyz etý salasynda birqatar ıgi joba qolǵa alyndy. Sonyń biri – «Qaýipsiz qala» jobasy.

Pavlodar oblysynda kóshelerdi aqyldy beınebaqylaý kameralarymen qamtamasyz etý júıesi tamyz aıynan bastaldy. Qoǵamdyq qaýipsizdik tujyrymdamasy sheń­berinde «Qaýipsiz qala» úsh jyldyq jobasy iske asyrylady. Bir ǵana Pavlodar qalasynda 3 myń kamera qoıylmaqshy.

– Joba aıasynda óńirde  5 myńǵa jýyq kamera ornatý josparlanǵan. Onyń ishinde Pavlodar qalasynda 3 myń jalpy beınebaqylaý kamerasy, Pavlodar, Aqsý, Ekibastuz qalalaryndaǵy jeli­lik ýchaskelerde 250 apparattyq-baǵ­dar­lamalyq keshen, 150 qıylysta apparattyq-baǵdarlamalyq keshen, sondaı-aq respýblıkalyq joldardyń jol apaty jıi qaıtalanatyn tusta­rynda 20 apparattyq-baǵdar­la­malyq keshen qoıylady. Beınebaqylaý júıesi boıynsha jobany «Antarium Group» JShS utyp aldy. Kompanııamen 3 jylǵa servıstik model boıynsha jal­py somasy 8,5 mlrd teńgege shart ja­saldy, – dep habarlady óńir­lik Sıfrlyq tehnologııalar basqarma­synyń basshysy Aǵybaı Ámirın.

Kóshe qıylystary men jaıaý júrginshiler joldaryna qoıylatyn «Mergen» apparatyq-baǵdarlamalyq kameralary taný nusqasyna ıe. Iаǵnı jyldamdyǵyn shekten tys arttyrǵan jáne baǵdarshamnyń tyıym salynǵan túsine ótken kólik quraldaryn tirkep, adamnyń bet-álpetin tanı alady, sondaı-aq kóshede qaldyrylǵan zattardy, tútinniń shyǵýyn anyqtaıdy. Tipti kólik ishinde qaýipsizdik belbeýin taqpaǵan, rýlde telefonmen sóılesip otyrǵan adam týraly da habarlaı alady.

– Kameralar eń áýeli shahar­lardaǵy jol qaýipsizdigin qamtamasyz etý maq­satynda qoıylyp jatyr. Jaıaý júr­ginshilerdi ótkizbegen júrgizýshilerdi anyqtap, ári qaraı jol polısııasynyń tıisti mekemelerine málimet jiberedi. Jetkizýshi kompanııa parallel elektr qýatyna qosylý úshin ruqsat qujattaryn alady. Barlyq kamera polısııa departamentiniń jedel basqarý ortalyǵyna jalǵanady, – dep túsindirdi basqarma basshysy.

Pavlodar oblysy jergilikti polısııa qyzmeti basqarmasy basty­ǵynyń mindetin atqarýshy Azamat Kúrkebaev oblys ortaly­ǵynda kólik apattary jıi bolatyn 7 jol qıylysyna da «Mergen» keshenderi qoıylǵanyn jetkizdi. Bulardyń barlyǵy 1 qarashadan jumys isteı bastaıdy.

Pavlodar oblysy