Kezdesý ashyq dıalog formatynda ótti. Bul kásipkerlerge ózderin tolǵandyrǵan suraqtardy tikeleı qoıýǵa jáne árbir baǵyt boıynsha jan-jaqty túsinikteme alýǵa múmkindik berdi. Qatysýshylar shaǵyn bıznes sýbektileriniń jeńildetilgen salyq rejıminde jumys isteýi men qosylǵan qun salyǵyn (QQS) tóleýshiler arasyndaǵy ózara árekettestigine erekshe nazar aýdardy. Sonymen qatar, jeńildetilgen salyq rejıminde jumys isteý quqyǵyn saqtap qalǵan kásipkerler sanattary týraly jeke aqparat berildi.
Ulytaý oblysy kásipkerler palatasynyń dırektory Gúlmıra Qajenova «Atameken» Ulttyq kásipkerler palatasynyń jumysynyń arqasynda 2026 jyldan bastap jeńildetilgen salyq rejıminde jumys isteýge ruqsat etilgen 316 qyzmet túri saqtalyp qalǵanyn atap ótti. Mınıstrlik ókilderiniń aıtýynsha, bul sanatqa halyqqa tikeleı qyzmet kórsetýmen aınalysatyn kásipkerlik sýbektileri engen. Budan bólek, «Atameken» UKP bul tizimdi qaıta qaraý boıynsha jumys júrgizýde. Memlekettik organdarǵa ony qysqartý qajettiligin dáleldeý múmkin boldy. Qazirgi tańda qujat Ashyq NQA portalynda qoǵamdyq talqylaý satysynda tur, jáne bıznes ókilderiniń óz usynystaryn engizýge múmkindigi bar.
— Bizdiń qazirgi mindetimiz – barlyq negizdi usynystardy jınaqtap, olardy Ulttyq ekonomıka mınıstriniń atyna shuǵyl túrde joldaý. Basty maqsatymyz – bólshek saýdamen aınalysatyn adal kásipkerlerdi bul shekteý tiziminen shyǵarý,- dep atap ótti Gúlmıra Izatýllaqyzy.
Jalpy, EQJJ (OKED) tiziminde 1 111 qyzmet túri bar, onyń ishinde 795 baǵyt shekteý tizimine engen. B2C segmentine baǵyttalǵan shaǵyn bıznes arnaıy salyq rejımi boıynsha jumysyn jalǵastyrady, al iri qyzmet túrleri jalpyǵa birdeı belgilengen tártipke kóshedi.
«Árbir kásipker óz bıznesiniń ereksheligin eskere otyryp, qaı sanatqa jatatynyn ózi tańdaı alady» deıdi memlekettik organ ókilderi.
Aıta ketý kerek, Ulytaý oblysy kásipkerler palatasy salyqtyq júktemeni, ásirese shaǵyn bıznes sýbektileri úshin, azaıtý boıynsha jumystar júrgizýde. Jańa Kodekste bul – jeńildetilgen deklarasııa negizindegi arnaıy salyq rejımi mólsherlemesiniń 4%-dan 2%-ǵa deıin tómendeýi. Máslıhattardyń bólshek salyq mólsherlemesin tómendetý týraly sheshimderi jergilikti óndiristi damytýǵa, bıznesti zańdastyrýǵa jáne salyq túsimderin arttyrýǵa oń áserin tıgizedi.
Ulytaý oblysy
