Atyraý oblysynyń mamandandyrylǵan aýdanaralyq qylmystyq ister jónindegi sotynda kúdiktige qatysty qylmystyq is qaraldy. Kámeletke tolmaǵan qyzdy zorlaǵan Ý. esimdi kúdiktige Qylmystyq kodekstiń 120-babynyń 4-bóligimen, 99-babynyń 3-bóligimen aıyp taǵylǵan.
«2025 jyldyń maýsym aıynda Qulsary qalasynda 7 jastaǵy qyz Qursaı ózeniniń jaǵalaýynda serýendep júrip, úıine qaıtar jolda adasyp ketken. Ý. alkogoldik masań kúıde oǵan úıine baratyn joldy kórsetetinin aıtyp, ózimen birge júrýdi usynǵan. Qyzdy ózen jaǵasyna aparyp, kúsh qoldaný arqyly zorlaǵan. Jasaǵan qylmysyn jasyrý maqsatynda qyzdy uryp-soǵyp, keıin ózenge batyryp jibergen», dep atalǵan sottan.
Sottalýshynyń kinási kýálardyń aıǵaqtarymen, oqıǵa bolǵan jerdi qaraý hattamasymen, beınejazbalarmen jáne saraptama qorytyndylarymen tolyq dáleldendi.
Sot úkimimen Ý. taǵylǵan aıyptar boıynsha kináli dep tanyldy. Oǵan ómir boıyna bas bostandyǵynan aıyrý jazasy taǵaıyndaldy.
Úkim zańdy kúshine engen joq.
