«Inklıýzıvti bilim berý» uǵymy Qazaqstan Respýblıkasynyń «Bilim týraly» zańynda bekitilgen, bul barlyq balanyń erekshe bilim berý qajettilikteri men jeke múmkindigin eskere otyryp, bilim alý quqyǵyn kepildeıdi.
Zańnamalyq deńgeıde erekshe bilim berý qajettilikteri bar balalardy barlyq bilim deńgeıinde oqytyp, arnaıy jaǵdaı jasaýǵa memlekettik kepildik berilgen. Sondaı-aq bilim berý qajettiligin baǵalaýdy, psıhologııalyq-pedagogıkalyq qoldaýdy, oqý josparyn, baǵdarlamasyn jáne oqýshy jetistigin baǵalaý júıesiniń ártúrliligi men ıkemdiligin qamtamasyz etýge qatysty normalar engizilgen.
Búgingi tańda elimizde 6 myńnan astam mektepte (90%) ınklıýzıvti bilim berýge arnalǵan jaǵdaı jasalǵan. Sonyń ishinde kedergisiz qoljetimdilik jáne qajetti mamandarmen qamtamasyz etildi. Inklıýzıvti bilimmen 100 myńnan astam erekshe bilim berý qajettilikteri bar balalar qamtylǵan.
Memleket basshysynyń tapsyrmasy boıynsha «Keleshek mektepteri» ulttyq jobasy belsendi júzege asyp otyr. Joba aıasynda barlyǵy 460 myń oqýshy orny ashylady.
«Keleshek mektepteri» jobasy aıasynda pedagogtar men oqýshylarǵa yńǵaıly ári qaýipsizdik jaǵdaıy jasalǵan. Mundaı bilim oshaǵynda erekshe bilim berý qajettilikteri bar balalarǵa arnalǵan keńistikti beıimdeý qarastyrylǵan. Sondaı-aq psıholog, áleýmettik pedagog, logoped jáne basqa mamandar úshin arnaıy kabınet jabdyqtalǵan. Munda arnaıy pedagogtar, pedagog-psıhologtar jáne pedagog-assıstentter sııaqty bilikti mamandar jumys isteıdi. Olar erekshe qajettilikteri bar balalarǵa kómektesedi.
«Keleshek mektepteri» ınklıýzıvti bilim qaǵıdasyn kádimgi jalpy bilim beretin mektep sekildi tolyq júzege asyrady. Bilim ordasynda ǵımarattardy jobalaý kezinde kedergisiz orta talaptary eskerilgen: pandýstar, lıftter, keń ótkelder, arnaıy sanıtarlyq toraptar jáne nashar kóretinder men estý qabileti tómen adamdarǵa arnalǵan navıgasııa júıesi jasalǵan.
Oqý úderisi – barshaǵa qoljetimdi. Onyń aıasynda jeke oqý baǵdarlamalary, pedagog-assıstentter men psıhologııalyq-pedagogıkalyq qoldaý júzege asady. Sonymen qatar STEM zerthanalary men ınteraktıvti taqtalar sııaqty zamanaýı tehnologııany erekshe bilim berý qajettilikteri bar balalarmen birge árbir oqýshy paıdalanady.
Sońǵy eki jylda jańa formattaǵy 176 mektep salyndy. Bıyl jyl sońyna deıin taǵy 41 mektep paıdalanýǵa beriledi.
Bulbul ELEÝSINOVA,
Oqý-aǵartý mınıstrligi Inklıýzıvti jáne arnaıy bilim berý departamentiniń dırektory
