Qutqarýshy bolý – úlken jaýapkershilikti talap etetin mamandyq. Azamattyq qorǵaý salasy qyzmetkerleri úshin qutqarý, saqtaý, kómektesý, qorǵaý - eń basty mindet bolyp tabylady. Osyndaı qıyn jáne qaýipti salada eńbek etip, ózine júktelgen mindetti abyroımen atqaryp júrgen Syrym Beısenbaıuly búgin «Eren eńbegi úshin» medaline ıe boldy.
«Bul meniń kóp jyldyq eńbek jolymdaǵy eń mereıli marapatym boldy», deıdi qutqarýshynyń ózi.
Syrym Beısenbaıuly Atyraý oblysy, Mahambet aýdany, Tańdaı aýylynda 1975 jyly ómirge kelgen. Bala kúninen naǵashy apasy sekildi munaıshy bolýdy armandapty. Ásirese burǵylaý isine qatty qyzyqqan. Osy armanynyń jetegine erip Atyraý munaı jáne gaz ınstıtýtynda burǵylaýshy mamandyǵy boıynsha bilim alady. 2008 jyldan bastap qyzmetin Atyraý oblystyq Tótenshe jaǵdaılar departamentinde О́nerkásip qaýipsizdik salasy, qaýipti óndiristik obektilerdegi apattardyń aldyn alý jáne joıý bóliminde jalǵastyrady.
«2025 jyly naýryz aıynda «Embimunaıgazǵa» qarasty Batys Prorva ken alańynda uńǵymadan gaz atqylap, apattyq jaǵdaı oryn aldy. Osy apatty joıý jumysyna qatysqanym úshin búgin Prezıdenttiń qolynan marapat aldym. Bul bir erekshe sát boldy. Azamattyq qorǵaý salasy qyzmetkerleri mundaı qurmetke alǵash ret ıe bolyp otyr. Eńbegimizdi elegen Memleket basshysyna, Tótenshe jaǵdaılar mınıstri Shyńǵys Saıranulyna alǵysym sheksiz» deıdi Syrym Beısenbaıuly.
Bıyl elýdi eńsergen eren eńbek ıesi qyzmette jas qutqarýshylarǵa úlgi bolarlyqtaı ustaz bolsa, otbasynda 2 ul men 1 qyz tárbıelep otyrǵan úlgili áke.
