Is-sharany QR Prezıdenti janyndaǵy Qazaqstannyń strategııalyq zertteýler ınstıtýty (QSZI) Astana halyqaralyq forýmy (AIF) aıasynda uıymdastyrdy. Forýmǵa 20 elden 40-qa jýyq sheteldik sarapshy — álemniń jetekshi «mozgovoı sentrleriniń» basshylary, zertteýshiler jáne sarapshylar qatysty.
Astana Think Tank Forum alǵash ret 2024 jyly ótken bolatyn. Bir jyldyń ishinde bul alań halyqaralyq kún tártibindegi ózekti máselelerdi talqylaıtyn bedeldi saraptamalyq forým retinde tanyldy. Forým reformalarǵa arnalǵan sessııamen ashyldy. QR Prezıdentiniń keńesshisi Maqzum Mırzaǵalıev qatysýshylardy quttyqtap, Prezıdent Qasym-Jomart Toqaevtyń kózqarasyna súıene otyryp, Qazaqstan beıbitshilik, senim jáne jaýapty dıplomatııa qundylyqtaryn turaqty túrde ilgeriletip kele jatqanyn atap ótti.
Syrtqy ister mınıstriniń birinshi orynbasary Erjan Ashyqbaev qazirgi jaǵdaıda «konstrýktıvti konsensýs» qalyptastyrý men kópjaqty yntymaqtastyqty nyǵaıtýdyń erekshe mańyzǵa ıe ekenin aıtty. Onyń sózinshe, turaqty ári ádil álemdik tártipti saqtaý jaýapkershiligi endi keń aýqymdy memleketterge júktelip otyr.
Forým aıasynda toǵyz sessııa uıymdastyryldy. Onda jetekshi derjavalardyń básekelestigi jaǵdaıynda kópjaqty yntymaqtastyqtyń keleshegi, qaýipsizdik arhıtektýrasynyń transformasııasy, ıadrolyq qarýsyzdaný jáne taratpaý máseleleri talqylandy. Sondaı-aq Aýǵanstan faktorynyń Ortalyq Azııa aımaǵyna yqpaly, jahandyq naryqtardyń fragmentasııasy jaǵdaıyndaǵy ınvestısııalar, Eýrazııadaǵy saýda-kólik dálizderiniń damýy, jasandy ıntellekt pen oǵan qatysty etıkalyq dılemmalar, klımattyq ózgerister men sý resýrstarynyń tapshylyǵynyń demografııalyq úrdister men kóshi-qonǵa áseri de kún tártibinde boldy.
Ortalyq is-sharalardyń biri — «Ortalyq Azııa ózgerip jatqan jahandyq qaýipsizdik arhıtektýrasynda» atty III Ortalyq Azııa qaýipsizdik jáne yntymaqtastyq forýmy boldy. Oǵan qatysqan aımaqtyń jetekshi saraptamalyq ortalyqtarynyń basshylary halyqaralyq qaýipsizdik júıesindegi ózgeristerdiń aımaqtyq turaqtylyq pen damý úshin týyndatatyn syn-qaterlerin taldady. Sonymen qatar aımaq elderiniń ózara yntymaqtastyǵy men Ortalyq Azııanyń jahandyq dıalogtaǵy kópir retindegi róli qarastyryldy.
Forým aıasynda QR Prezıdenti janyndaǵy QSZI bastamasymen Central Asia Insights atty jańa sıfrlyq ǵylymı bilim platformasy tanystyryldy. Ol Ortalyq Azııadaǵy zertteý jáne analıtıkalyq áleýetti biriktirýge, almasýǵa jáne ilgeriletýge baǵyttalǵan. Forýmda osy platformaǵa ornalastyrylǵan birqatar baıandamalar usynyldy. Olar Aýǵanstanmen yntymaqtastyqtyń múmkindikteri men syn-qaterleri, ýrbanıstıka, demografııalyq trendter jáne jasyl energetıka máselelerin qamtydy. Sonymen qatar QSZI basshylyǵy Vengrııa, Ońtústik Koreıa, О́zbekstan, Pákistan jáne Irannyń taldaý ortalyqtarymen ekijaqty kezdesýler ótkizdi. Pákistannyń Halyqaralyq strategııalyq zertteýler ortalyǵymen yntymaqtastyq týraly memorandýmǵa jáne О́zbekstan Prezıdenti janyndaǵy Strategııalyq reformalar agenttigimen is-sharalar josparyna qol qoıyldy.
Forým jumysynyń qorytyndysynda QR Prezıdenti janyndaǵy QSZI dırektory Jandos Shaımardanov Astana Think Tank Forum 2025 alańynyń senimge, ashyq pikirtalas pen praktıkalyq sheshimderge negizdelgen halyqaralyq saraptamalyq format retindegi tıimdiligin atap ótti. Bul forým jahandyq polıarızasııa tereńdep bara jatqan qazirgi kezeńde halyqaralyq júıege degen senimdi qalpyna keltirýge jáne aımaqtyq seriktestikti nyǵaıtýǵa baǵyttalǵan mańyzdy dıalog alańy retinde baǵalandy.
