Foto: depositphotos.com
Kúdiktilerdiń qatarynda – «QazConstructions» JShS-niń burynǵy dırektorynyń orynbasary, Kúrshim aýdany máslıhatynyń depýtaty bar. Olardyń zańsyz áreketiniń saldarynan 4 dene shynyqtyrý-saýyqtyrý kesheni men 20 myńnan astam adam turatyn 7 aýyldy sýmen qamtamasyz etýge arnalǵan sý qubyry jelileri paıdalanýǵa berilmegen.
Jymqyrylǵan qarjynyń jalpy kólemi 2 mlrd teńgeden asady. Kúdiktiler baılanysy bar kompanııalar arqyly qarjyny qolma-qol aqshaǵa aınaldyrylǵan.
«Qylmystyq jolmen alynǵan tabysqa Astanadaǵy qymbat sanattaǵy turǵyn úı keshenderinen páterler, «Lamborghini Urus», «Cadillac Escalade», «Mercedes» avtokólikteri men asyl tuqymdy jylqylar satyp alynǵan. Bul múlikke sot sanksııasymen tyıym salyndy», delingen QMA habarlamasynda.
Qazir olarǵa qatysty tergeý jalǵasyp, eki aı merzimge qamaýǵa alý túrindegi bultartpaý sharasy qoldanylǵan.
