Foto: businessmir.kz
Keıingi úsh jylda telekommýnıkasııa salasyna 1 trln teńgeden astam ınvestısııa baǵyttalǵan. Bul eldegi ınternettiń ortasha jyldamdyǵyn 94 Mbıt/s deıin arttyrýǵa múmkindik bergen.
«Salany damytý 2024–2027 jyldarǵa arnalǵan «Qoljetimdi ınternet» ulttyq jobasy aıasynda júzege asyrylýda. 2027 jyldyń sońyna deıin halyqtyń 100%-y ınternetpen qamtylady. Internet jyldamdyǵy 100 Mbıt/s-tan asyp, optıkalyq baılanys jelileri aýyldyq eldi mekenderdiń 90%-yna deıin tartylady», dedi Jaslan Mádıev.Vıse-premer 2026 jyldyń sońyna deıin taǵy 3000-nan astam aýyldy magıstraldy talshyqty-optıkalyq baılanys jelisine qosý kózdelgenin atap ótti. Osylaıshy aýyldardyń 90%-dan astamy symdy tehnologııalar arqyly joǵary jyldamdyqty ınternetke qosylady. Osy jobalardy júzege asyrý úshin 2027 jyldyń sońyna deıin jalpy kólemi 323 mlrd teńgeni quraıtyn ınvestısııa qarastyrylǵan. Shaǵyn aýyldardyń qalǵan 10%-y spýtnıktik tehnologııalar arqyly ınternetpen qamtamasyz etiledi. Sonymen qatar Jaslan Mádıev mobıldi jelilermen qamtý kólemi de artatynyn tilge tıek etti. Máselen, 4G jelisi barlyq eldi mekenderdiń 92%-yna deıin jetedi. Al 5G jelisi oblystyq jáne respýblıkalyq mańyzy bar 20 qalaǵa engizilip, qalalardyń 60-75% aýmaǵyn qamtıtyn bolady. 2027 jyldyń sońyna deıin 40 000 shaqyrym avtojol boıy 4G mobıldi ınternetimen qamtamasyz etiledi.
Mınıstr ınternet jáne mobıldi baılanys arqyly jasalatyn alaıaqtyqpen kúresý jolynda qabyldanyp jatqan sharalar týraly da baıandady.
«Mınıstrlik baılanys operatorlary úshin jańa talaptar engizdi. Onyń ishinde abonentterdi bıometrııalyq ıdentıfıkasııalaý, frod áreketterin zańsyz trafıkke teńestirý, operatorlardyń antıfrod júıeleri men Ulttyq bank arasyndaǵy ózara árekettesý tártibin naqtylaý qarastyrylǵan. Qabyldanǵan sharalar 2024 jyldyń basynan beri 30 mln-nan astam kúdikti qońyraýlarǵa tosqaýyl qoıýǵa múmkindik berdi», dep atap ótti vıse-premer.
