Jetisý oblysy ákiminiń baspasóz qyzmetiniń habarlaýynsha, Taldyqorǵan turǵyndary men qala qonaqtary jármeńkede aýyl sharýashylyǵy taýar óndirýshilerinen tikeleı qoljetimdi baǵada balǵyn ári sapaly ónimderdi satyp aldy. Jármeńkede shamamen 137 tonna bolatyn 54 túrli ónim usynyldy. Atap aıtqanda, 19,1 tonna kókónis, 12,1 tonna et, 3,5 tonna balyq, 1,4 tonna sút ónimderi, 20,4 tonna kartop, 7,7 tonna jemis-jıdek, 4 tonna qant, 0,8 tonna bal jáne shamamen 72 tonna basqa da túrli ónimder saýdalandy.
Satýshylar men kelýshiler jármeńkeniń qos tarapqa da tıimdi ekenin jetkizdi.
– Bizde taýyq etinen jasalǵan ónimniń túr-túri bar, sonymen qatar jumyrtqanyń birneshe sortyn usyndyq. Jármeńkege 100 kılo taýyq eti, 50 kılo balapan eti jáne qosymsha sýbónimder alyp keldik. О́nimderge suranys joǵary, bul onyń sapaly jáne baǵasynyń qoljetimdi bolǵanyn bildiredi. Mysaly, bir dana jumyrtqanyń baǵasy 25 teńge men 55 teńgeniń aralyǵynda, – deıdi «Koger LTD» JShS fırmalyq dúkeniniń satýshysy Aıgúl Satybaldına.
Aqsý aýdanynyń fermeri Serikbol Qaıratbek jármeńkege qoı etin alyp kelgenderin aıtady. «Mal sharýashylyǵymen 10 jyldan beri aınalysamyz. Taldyqorǵandyqtar bizdiń ónimimizge rıza bolatynyna senemiz» deıdi ol.
– Biz ónimderdiń san túri men tómen baǵalaryna rıza boldyq. Bári de ádemi, uqypty qoıylǵan, kóz súısinedi. Et, balyq, kókónis satyp aldyq. Osyndaı jármeńkeler jıi uıymdastyrylsa eken deımiz. Mereke qarsańynda halyq ıgiligi úshin aýyl sharýashylyǵy jármeńkesiniń ótkizilgenine qýanamyz, – dedi taldyqorǵandyq Pogorelovtar otbasy.
Negizgi azyq-túlik taýarlarynyń baǵasyn turaqtandyrý jáne otandyq óndirýshilerdi qoldaý maqsatynda Taldyqorǵanda uıymdastyrylǵan jármeńkede 128,8 mln teńgeden astam somaǵa aýyl sharýashylyǵy ónimderin satý josparlanǵan.
