Oǵan 150-ge jýyq áıel qatysty. Marafonshylar túrli jas kategorııalary boıynsha synǵa tústi. Sondaı-aq qalanyń jasy 50-den asqan belsendi turǵyndary skandınavııalyq júris boıynsha jarysty.
Marafonshylar Jambyl kóshesindegi alleıa arqyly jaǵajaıǵa deıingi jáne qaıtar baǵyttaǵy joldy eńserdi.
Sharanyń ashylý saltanatynda: «Qoǵamda áıelderdiń orny bólek. Názik jandylarsyz bizdiń ómirdi elestetý múmkin emes. «Qyzǵylt qazan» aıy sizderdiń densaýlyqtaryńyzǵa, qaterli isiktiń aldyn alýǵa baǵyttalǵan aı. Táni saýdyń – jany saý. Sol sebepti únemi dárigerlerge tekserilip júrýge keńes beremiz. Marafonda barshańyzǵa sáttilik tileımin», – dedi qala ákiminiń orynbasary Tólegen Kenjebekov.
Al qalalyq kópsalaly aýrýhana dırektorynyń orynbasary Aısulý Ońǵarova sút bezi qaterli isigi jaıly derekterge toqtalyp ótti.
«Qyzǵylt qazan» – tek aksııa emes, bul aýrý týraly aqparattandyrý, qoldaý men áıelder ómirin ózgertýge kómek kórsetý aıy. Eger obyrdy der kezinde anyqtasa, 90% jaǵdaıda emdelip ketýge múmkindik bar. Mammologqa tekserilip, ÝDZ-dan jyl saıyn ótip turyńyzdar. Búgingi marafon densaýlyqqa umtylý men tek alǵa baǵyt alýdyń nyshany bolsyn. Barlyqtaryńyzǵa baqyt, shattyq, tabys tileımin» – dedi.
Jarys nátıjesinde jeńimpaz atanǵandarǵa baǵaly syılyqtar, medaldar men aqshalaı syılyqtar tabys etildi.
«30 jasqa deıingilerdiń arasynda 1-oryndy ıelendim. Jarys ótetini týraly estigen sátten-aq qatysýǵa bel býdym. Uıymdastyrýshylarǵa raqmet. Qalamyzdyń áıelderi aman bolsyn! Marafon joǵary deńgeıde ótti», – dedi Adelına esimdi qatysýshy.
Sonymen qatar jyljymaly medısınalyq keshende 65 áıel mammografııa men ÝDZ-dan tegin ótti.
Qonaev qalasynyń ákimdigi marafonnyń ótýine demeýshilik kórsetip, seriktes bolǵan kásipkerlerge alǵysyn bildirdi.
Almaty oblysy.
