Atyraý oblysy boıynsha ekonomıkalyq tergep-tekserý departamentiniń basqarma basshysy Bekbolat Ánesovtiń málimetinshe, osy kezeńde 60 qylmystyq is tergeýge alynǵan.
«Departament qyzmetkerleriniń basty mindeti – ekonomıkalyq turaqtylyqty qamtamasyz etip, qarjylyq quqyq buzýshylyqtarǵa jol bermeý. Tergeýge alynǵan ár is naqty dálelderge súıenip, memleketke keltirilgen shyǵyndy óteýge baǵyttalady. Jyl basynan beri 24 qylmystyq isti tergeý aıaqtalyp, 22-si sotqa joldandy», dedi Bekbolat Ánesov.
Onyń deregine súıensek, anyqtalǵan zalal somasy 1,5 mıllıard teńgeden asyp otyr. Bul qarjynyń 964 mıllıon teńgesi qolma-qol qaıtaryldy.
«Memleketke qaıtarylǵan jalpy zalal kólemi múlikke toqtam salý sharalaryn qosa eseptegende, 3 mıllıard teńgege jýyqtady. Jyl basynan beri 8 qarjylyq pıramıda deregi tirkeldi. Qarjylyq pıramıdalardyń salymshylarynyń jalpy sany 2000-nan asty. Tergeý kezinde kúdiktilerdiń esepshottarynan 102 mıllıon teńge buǵattaldy», dep málimdedi Bekbolat Ánesov.
Sondaı-aq, aksızdik markasy 117 myń qorap temeki men zańsyz aınalymdaǵy veıp ónimderi tárkilengen. Al jalǵan shot-faktýra rásimdeý arqyly 8 mıllıard teńgeden asatyn somaǵa salyqtan jaltarý deregi anyqtalǵan.
«Aıyptylar kináli dep tanylyp, olarǵa 2 jyldan 4 jylǵa deıingi bas bostandyǵynan aıyrý jazasy taǵaıyndaldy. «Kıberqadaǵalaý» aqparattyq júıesi arqyly ınternet jelisinde tirkelgen 3 135 silteme anyqtalyp, 2 364-i buǵattaldy», dep habardar etti Bekbolat Ánesov.
