Eske sala keteıik, jańa 2025-2026 oqý jylynda 83 oqý ordasy jańadan ashyldy, onyń 57-si «Keleshek mektepteri» ulttyq jobasy aıasynda salynǵan mektepter. Osy oqý ordalarynyń árbirinde negizgi maqsatty júzege asyrýǵa atsalysatyn myqty mamandar jumys isteýi qajet. Sondyqtan «Keleshek mektepteriniń» mamandaryna da kóptep mán berilip jatyr.
QR Oqý-aǵartý mınıstrliginiń «О́rleý» biliktilikti arttyrý ulttyq ortalyǵy «Keleshek mektepteri» ulttyq jobasy aıasynda muǵalimderdiń kásibı quzyrettiligin arttyrý boıynsha júıeli jumys júrgizdi. Qazirgi tańda «Keleshek mektepteriniń» 7 myńnan astam muǵalimi LMS platformasy arqyly biliktilikti arttyrý kýrstarynan ótýde. Onda bazalyq deńgeıdegi 11 pán qamtylǵan: bastaýysh synyp, qazaq, orys jáne aǵylshyn tilderi, matematıka, ınformatıka, fızıka, hımııa, bıologııa, geografııa jáne tarıh.
Baǵdarlama pándik bilimdi negizgi jumysynan qol úzbeı jańartý, kásibı quzyrettilikti arttyrý jáne muǵalimderge ádistemelik qoldaý kórsetýge baǵyttalǵan. Sonyń ishinde, pándik bilimdi tereńdetý, oqytý sapasyn arttyrý, oqýshylarmen tıimdi qarym-qatynas ornatý syndy baǵyttarǵa nazar aýdaryldy. Aldaǵy ýaqytta da pedagogter basym baǵyttar boıynsha oqytýmen qamtylatyn bolady.
«Keleshek mektepterin» basqarý da tıimdilik prınsipteri boıynsha uıymdastyrylady. Dırektorlardy taǵaıyndaý kezinde basymdyq «Bilim berý salasyndaǵy 1000 ózgeris kóshbasshysy» jobasyna qatysqan úmitkerlerge beriletin bolady. Bul joba prezıdenttik jastar kadr rezerviniń úlgisinde jasalǵan. Onda bolashaq basshylardy qyzmetke taǵaıyndalmaı turyp daıyndaýdy mindetteıtin halyqaralyq tájirıbe negizge alynǵan. Úmitkerler bes kezeńnen turatyn irikteýden ótip, keshendi túrde oqytylady. Oǵan qosa, tálimgerlermen jumys istep, taǵylymdamadan ótedi. Mundaı tásil synı oılaıtyn ári ózgeristerge daıyn basqarýshylardy qalyptastyrýǵa múmkindik beredi.
2023-2024 jyly kadrlyq revervke engen 583 pedagogtiń 70 paıyzdan astamy konkýrssyz basshylyq qyzmetke taǵaıyndaldy. 2025 jyly taǵy 403 dırektor orynbasary rezervke qabyldandy. Sonyń nátıjesinde, mektep dırektorlarynyń tapshylyǵy úsh esege qysqardy. Ásirese, jańa formattaǵy «Keleshek mektepterine» basa nazar aýdarylyp otyr. Búginde Qazaqstan boıynsha ulttyq joba aıasynda ashylǵan 151 mektep jumys isteıdi. Onyń ishinde 40 mektepti «Bilim berýdegi ózgeristerdiń 1000 kóshbasshysy» jobasynyń rezervısteri basqarady. Osylaısha, bul bilim ordalary jańa standarttardy, sıfrlyq tehnologııalardy jáne tárbıelik baǵyttaǵy tájirıbelerdi engizetin alańǵa aınalýda.
Zeınep Mahsutova, QR OAM Orta bilim berý komıteti tóraǵasynyń orynbasary
