Foto: Aqorda
«Bárimiz bir el bolyp qolǵa alǵan reformalardyń túpki maqsaty – Qazaqstandy jańa jaǵdaıǵa beıimdeý, sol arqyly elimizdiń egemendigin nyǵaıtyp, básekege qabiletin arttyrý. Memleket basshysy retinde men jerimizdiń tutastyǵyn, elimizdiń derbestigin jáne ekonomıkalyq damýyn qamtamasyz etýim kerek. Bul – meniń azamattyq boryshym», dedi Prezıdent.
Qasym-Jomart Toqaevtyń aıtýynsha, qazir álem túbegeıli jańa tarıhı kezeńge qadam basty. Bir jaǵynan, qaqtyǵystar men soǵystar azaımaı tur, basqa jaǵynan, joǵary tehnologııalar, jasandy ıntellekt tez damyp keledi.
«Osyndaı kúrdeli jaǵdaıda elimiz damýdyń dańǵyl jolyna tústi. Barsha elmen dostyq qatynas ornatyp, memleketimizdi senimdi seriktes retinde tanyttyq. Sonyń arqasynda energetıka, kólik, logıstıka, aqparattyq tehnologııa, aýyl sharýashylyǵy jáne basqa da salalarǵa qomaqty ınvestısııa tartyp jatyrmyz. Qazirgi almaǵaıyp zamanda salıqaly dıplomatııa dástúrine negizdelgen syrtqy saıasatty ustaný aıryqsha mańyzdy. Biz memleketterdiń bári ózara til tabysyp, ortaq mámilege kele bilgeni jón dep sanaımyz. О́zara senim men qurmetti nyǵaıtyp, áriptestik qarym-qatynasty damytý qajet dep esepteımiz», dedi Prezıdent.
Memleket basshysy jaqynda Almatyda Birikken Ulttar Uıymynyń Ortalyq Azııa men Aýǵanstan úshin ornyqty damý maqsattary jónindegi óńirlik ortalyǵy ashylǵanyn atap ótti. Sondaı-aq muny zor jetistik dep aıtýǵa bolatynyn málimdedi.
«Men Birikken Ulttar Uıymy Bas Assambleıasynyń mereıtoılyq sessııasynda negizgi halyqaralyq máselelerge basa nazar aýdardym, birqatar usynys aıttym. Álemde barlyq eldiń múddesi eskeriletin ádil halyqaralyq qatynastar júıesin ornatý kerek. Qazaqstan dúnıe júzi qaýymdastyǵynyń jaýapty ári yqpaldy múshesi retinde aldaǵy ýaqytta da teńgerimdi ári syndarly syrtqy saıasat júrgizedi», dedi Qasym-Jomart Toqaev.
