«Damý» qory óńirlik fılıalynyń dırektory Medet Erbolulynyń aıtýynsha, Qostanaı oblysynda sonymen qatar «Bıznes-Kómek» aımaqtyq baǵdarlamasy júzege asyrylyp jatyr. Baǵdarlama sharttary boıynsha nesıeni Arqalyq qalasy, Amangeldi jáne Jangeldın aýdandarynyń aýmaǵynda tirkelgen kásipkerler ala alady. Bıyl bul baǵytta «Damý» qorynyń Qostanaı fılıaly jalpy somasy 200 mln teńge bolatyn 6 sýbsıdııa shartyna qol qoıǵan.
О́ńirlik fılıal tarapynan qoldaý tapqan jobalardyń deni óńdeý ónerkásibine, aýyl sharýashylyǵy, medısına, saýda-sattyq salasyna tıesili.
«Shaǵyn jáne orta bıznes ekonomıkany damytýda sheshýshi ról atqarady. «Damý» qory ulttyq damý ınstıtýty bola otyryp, Qazaqstannyń barlyq óńirlerinde ShOB-tyń sapaly damýyna járdemdesedi. Onyń ekonomıkalyq áseri mol. Bizdiń mindetimiz – memlekettik qoldaý quraldary kásipkerlerdiń damýyna, jańa jumys oryndaryn qurýǵa, óndiriletin ónim túrlerin keńeıtýge, taýar aınalymyn ulǵaıtýǵa jáne naryqtaǵy óz pozısııalaryn nyǵaıtýǵa kómektesýi. Bul aımaqtyq ekonomıkanyń turaqtylyǵyna jáne adamdardyń ómir súrý sapasyna tikeleı áser etedi», deıdi qordyń oblystaǵy fılıalynyń dırektory Medet Erboluly.
«Damý» Qory uıymdastyrǵan baspasóz týry barysynda BAQ ókilderi makaron ónimderin shyǵaratyn «Adal LTD» zaýytynda boldy. Atalǵan kásiporyn memlekettik qoldaý aıasynda makaron ónimderin shyǵaratyn zamanaýı qurylǵy satyp alǵan. Jańa tehnologııa negizinde jumys isteıtin «aqyldy» qurylǵy saǵatyna 300 kg qysqa, 100 kg uzyn makaron shyǵarady.
«Jańa jeliler bizge ulttyq jáne halyqaralyq standarttarǵa sáıkes keletin joǵary sapaly ónimder shyǵarýǵa múmkindik berip otyr. Jańa jobany iske asyrý barysynda jalpy aýdany 4000 sharshy metr qoımasy bar jańa óndiris alańy salyndy. Bul ǵımarat ónerkásiptik qaýipsizdik, gıgıena jáne energııa tıimdiliginiń barlyq talaptaryna jaýap beredi», deıdi kásiporyn basshysy Talǵat Naýryzbaev.
«Adal LTD» JShS memlekettik baǵdarlamalarǵa birneshe ret qatysyp, aınalym qarajaty men ınvestısııa úshin qarjy alǵan. 2024 jyly kompanııa «Qazaqstan Halyq bankinen» «Damý-О́ndiris» baǵdarlamasy aıasynda jeńil nesıe alyp, óndiristik jeliler satyp alady. Al 2025 jyly shildede «О́rleý» baǵdarlamasy aıasynda aınalym qarajatyn tolyqtyrý úshin jylyna 12,6%-ben jeńil nesıe alǵan. Kompanııa ónimderi «Arvena» brendimen shyǵarylady.
«Jańa jeli táýligine 72 tonna makaron, 24 tonna kespe shyǵarady. Kompanııada osy joba aıasynda 18 jańa jumys orny ashyldy. О́ndiris kólemi ulǵaıǵan soń ónimderimizdi osy óńirde, el kóleminde saýdaǵa shyǵarýmen qatar, alys jáne jaqyn shetelderge eksporttaýǵa múmkindik aldyq», deıdi zaýyt basshysy.
«О́rleý» baǵdarlamasyn tıimdi paıdalanyp otyrǵan kásiporynnyń biri – jıhaz materıaldaryn shyǵaratyn «KIRA» kompanııasy. Atalǵan kásiporynnyń aýmaǵy 12000 sharshy metrden asatyn óndiristik alańy bar. Mundaǵy zamanaýı avtomatty jeliler táýligine 10 000 sharshy metrge deıin MDF qasbetterin, aıyna 12000 taqtaı materıaldaryn, 3000 dana daıyn jıhaz buıymdaryn shyǵarady.
Kompanııa ónimderin Almaty, Astana, Qostanaı, Aqtóbe, Kókshetaý qalalaryna jiberedi.
«2025 jyldyń tamyzynda bizdiń kompanııa «Damý» Qorynyń «О́rleý» baǵdarlamasy aıasynda «Qazaqstan Halyq bankinen» aınalym qarajatyn tolyqtyrý úshin 12,6%-ben nesıe aldy. Osy qoldaý qarjynyń kómegimen kompanııa jańa jumys oryndaryn quryp, óndiris qýatyn arttyrdy. Joǵary sapa standarttaryn saqtaı otyryp, ónim kólemin kóbeıtýge múmkindik aldy», deıdi kásiporyn basshysy Denıs Dıadıýn.
Qostanaı oblysy
