Sot dereginshe, 2025 jyldyń qańtarynan qyrkúıegine deıin Rýdnyı qalasynyń prokýrorynyń bastamasymen qala qurylys bóliminde qyzmetkerlerge negizsiz tólemder jasalǵany boıynsha tekseris júrgizilgen. Sol ýaqytta Ý. para alý maqsatynda qylmys jasaýdy kózdep, memlekettik mekeme basshysynyń mindetin atqarýshydan tekserýdi toqtatý jáne qylmystyq qýdalaýdan bosatý úshin 20 mln teńge talap etken. Ol aqsha alý kezinde quqyq qorǵaý organdarynyń qyzmetkerleri tarapynan qolma-qol ustalǵan.
Sottaǵy jaryssóz barysynda taraptardyń ustanymdary qarama-qaıshy boldy: memlekettik aıyptaýshy aıyptalýshyǵa 4 jyl 6 aı bas bostandyǵynan aıyrý jazasyn surady, al aıyptalýshy men onyń qorǵaýshylary aıyppulmen shektelýdi ótindi. Zań boıynsha bul qylmys úshin iri aıyppul ne 12 jylǵa deıin bas bostandyǵynan aıyrý jazasy qarastyrylǵan. Alaıda is jedeldetilgen tergeý tártibimen qaralǵandyqtan, eń joǵarǵy jaza 4 jyl 6 aı bolyp shekteldi.
Sot aıyptalýshynyń jeke basyn, qylmystyń sıpatyn jáne qoǵamdyq qaýiptilik dárejesin eskere otyryp, 4 jyl 6 aı merzimge bas bostandyǵynan aıyrý jazasyn taǵaıyndady. Sondaı-aq ol memlekettik qyzmette jumys isteý quqyǵynan ómir boıyna aıyryldy jáne «ádilettiń aǵa keńesshisi» synyptyq sheninen aıyryldy.
Úkim áli zańdy kúshine engen joq.
