Bul oqıǵa Qazaqstan men Reseı arasyndaǵy bilim berý salasyndaǵy yntymaqtastyqty nyǵaıtý jolyndaǵy mańyzdy qadam boldy.
MMHQI rektory Anatolıı Torkýnovtyń aıtýynsha, fılıaldyń ashylýy – Qazaqstannyń zamanaýı, básekege qabiletti joǵary bilim berý júıesin qalyptastyrý jáne halyqaralyq baılanystardy keńeıtý baǵytynda senimdi ilgerileýiniń aıǵaǵy.
Ol Qazaqstannyń jahandyq bilim berý standarttaryna ashyq ári baǵyttalǵan el ekenin atap ótti. Búginde elimizde reseılik joǵary oqý oryndarynyń 9 fılıaly tabysty jumys istep tur, onda shamamen 4 myń stýdent oqıdy, onyń ishinde 1 myńnan astamy memlekettik grant ıegerleri.
Sonymen qatar, Qazaqstan óz ýnıversıtetiniń kampýsyn Reseıde ashqan alǵashqy memleket atandy – ál-Farabı atyndaǵy Qazaq ulttyq ýnıversıtetiniń Omby qalasyndaǵy fılıalynyń ashylýyna Qazaqstan Prezıdenti Qasym-Jomart Toqaevtyń ózi qatysty. Budan bólek, 60 myń qazaqstandyq stýdent Reseıdiń joǵary oqý oryndarynda bilim alyp júr. Bul elder arasyndaǵy bilim berý salasyndaǵy senim deńgeıiniń joǵary ekenin kórsetedi.
Anatolıı Torkýnov fılıaldyń ashylýy eki memlekettiń adamı kapıtaldy damytý men álemdik bilim berý keńistigine ıntegrasııalanýǵa umtylysyn kórsetetin strategııalyq qadam ekenin aıtty.
Oqý baǵdarlamalary dıplomatııa, ekonomıka jáne joǵary tehnologııalar, sonyń ishinde jasandy ıntellekt salalarynyń toǵysynda jumys isteı alatyn jańa formattaǵy mamandardy daıarlaýǵa baǵyttalǵan.
MMHQI-dyń Astanadaǵy fılıaly halyqaralyq deńgeıdegi jańa býyn kóshbasshylaryn, dıplomattar men sarapshylardy daıarlaýǵa mańyzdy úles qosady, – dep túıindedi rektor.
