Truth Social jelisinde jazba jarııalaǵan Tramp Nıgerııadaǵy hrıstıandarǵa qarsy jasalyp jatqan qylmystarǵa alańdaýshylyq bildirip, AQSh bul jaǵdaıda «barlyq kómekti toqtatyp, qajet bolǵan jaǵdaıda ıslamdyq terrorısterdi tolyǵymen joıý úshin óz kúshterin engizýi múmkin» ekenin aıtty. Sondaı-aq ol Qorǵanys mınıstrligine áskerı is-qımyldarǵa daıyndalýdy tapsyrǵanyn málimdedi.
Pentagon basshysy Pıt Hegset te Tramptyń málimdemesine ún qatyp, X (burynǵy Twitter) áleýmettik jelisinde: «Nıgerııada da, basqa elderde de beıkúná hrıstıandardyń qyrylýy toqtaýy tıis. Qorǵanys mınıstrligi áreket etýge daıyn. Eger Nıgerııa úkimeti óz azamattaryn qorǵamasa, biz ıslamdyq terrorısterdi joıamyz», – dep jazdy.
О́z kezeginde Nıgerııa prezıdenti Bola Tınýbý bul aıyptaýlardy joqqa shyǵardy. Onyń aıtýynsha, Nıgerııa dinı tózimdilik pen senim bostandyǵyn basty qundylyq retinde ustanady.
«Nıgerııany ózge dinge tózimsiz el retinde sıpattaý – shyndyqqa janaspaıdy. Senim bostandyǵy men tózimdilik – bizdiń ulttyq biregeıligimizdiń ajyramas bóligi», – dedi Tınýbý X jelisinde.
Eske sala ketsek, 2025 jylǵy naýryzda AQSh Kongresiniń múshesi Krıs Smıt Nıgerııany erekshe alań týdyrǵan elder tizimine qosýdy usynǵan bolatyn. Al qazan aıynyń basynda senator Ted Krýz ben ókilder palatasynyń múshesi Raılı Mýr Nıgerııa bıligin hrıstıandarǵa qarsy qylmystarǵa kóz juma qarady dep aıyptaǵan edi.
Nıgerııanyń soltústiginde negizinen musylmandar, al ońtústiginde hrıstıandar turady. Eldiń soltústik-shyǵysynda 2009 jyldan beri «Boko Haram» terrorlyq uıymy áreket etýde. Onyń saldarynan 35 myńnan astam adam qaza taýyp, 2 mıllıonnan astam turǵyn bosqynǵa aınalǵan. Sonymen qatar, ortalyq aımaqtarda negizinen musylman baqtashylar men hrıstıan dıqandar arasynda jerge talasýdan týyndaǵan qaqtyǵystar jıilegen.
