Kelesi jyly Jasybaı kóliniń jaǵalaýynda aýqymdy abattandyrý jumystary bastalady. Sanıtarlyq-gıgıenalyq toraptar, jýyný kabınalary men kıim aýystyratyn bólmeler, saýda pavılondary, arqaly otyrǵyshtar men shatyrlary bar demalys aımaqtary, sondaı-aq balalar jáne sport alańdary ornatylady. Bul nysandardyń barlyǵy 3,7 ga aýmaqta ornalasady. Bul ekologııalyq týrızm talaptaryna saı zamanaýı ári jaıly demalys aımaǵyn qalyptastyrýǵa múmkindik beredi.
Al Sabyndykól kóliniń jaǵajaıyndaǵy jumystar men baqylaý alańynyń qurylysy aıaqtalýǵa jaqyn. Jańartylǵan jaǵajaıda arqaly otyrǵyshtar, shatyrlar, pırster (sonyń ishinde múmkindigi shekteýli azamattarǵa da beıimdelgen), sanıtarlyq-gıgıenalyq nysandar ornatylǵan. Sondaı-aq demalys aımaqtary, átkenshekter, oıyn jáne sport alańdary, 80 kólikke arnalǵan turaq oryndary qarastyrylǵan.
- Baqylaý alańy Sabyndykól kóli men ony qorshap turǵan taýlardyń keremetteı kórinisi ashylatyn bıiktikte ornalasqan. Munda shaǵyn sáýlettik nysandar ornatylyp, jaıaý júrginshiler joldary abattandyryldy, jaryqtandyrý júıesi men týrısterge arnalǵan foto-aımaq jasaldy. Al Baıanaýyl aýylyna kireberis jolda salynyp jatqan vızıt-ortalyqtyń jalpy aýdany 740 sharshy metrdi quraıdy. Qurylys josparly túrde júrip jatyr, jumystardy bıylǵy jyldyń jeltoqsan aıynda aıaqtaý josparlanǵan. Vızıt-ortalyqtyń ishki keńistigi kópfýnksıonaldy bolmaq: kitaphana aımaǵyn dáris pen semınar ótkizý zalyna aınaldyrýǵa bolady, ana men bala bólmeleri, jaıly kofehana, ólketaný murajaıy jáne demalys oryndary qarastyrylǵan. Nysannyń qoljetimdiligine basa nazar aýdaryldy - ortalyq múmkindigi shekteýli týrısterdiń qajettilikterine tolyq beıimdelgen, - dep habarlady oblys ákiminiń baspasóz qyzmetinen.
Vızıt-ortalyqtyń taǵy bir baǵyty — onyń sıfrlyq mazmuny. Munda Baıanaýyl aýdanynyń kartasy bar sensorly ınteraktıvti tach-panel, mýltımedııalyq taqtalar jáne 3D-proeksııalar ornatylady. Kelýshiler aımaqtyń tabıǵı eskertkishterimen, kıeli oryndarymen, arheologııalyq nysandarymen jáne kórnekti tulǵalarymen ınteraktıvti túrde tanysa alady.
Pavlodar oblysy
