Foto: primeminister.kz
Úkimettiń baspasóz qyzmetiniń málimdeýinshe, rekonstrýksııalaý jumysynyń maqsaty – qurylystyń beriktigin nyǵaıtý jáne eldi mekenniń tolyqqandy qorǵalýyn qamtamasyz etý. Bógetti tolyq rekonstrýksııalaý jobasyna avtojoldardy qalpyna keltirý, temirbeton plıtalaryn tóseý, drenaj júıesi jáne abattandyrý kiredi. Barlyq is-shara aıaqtalǵannan keıin gıdrologııalyq nysannyń joǵarǵy deńgeıi 2024 jylǵy sý tasqynynyń eń joǵary deńgeıine teń deńgeıde belgilenedi.
Jobany júzege asyrý myńǵa jýyq halqy bar Teplıchnoe aýylyn sý tasqynynan qorǵaýdy qamtamasyz etedi.
Úkimet eldi mekenderdi sý tasqynynan qorǵaý jumystaryn júrgizip jatyr. Sý resýrstary jáne ırrıgasııa mınıstrliginiń derekteri boıynsha alty óńirde – Aqmola, Aqtóbe, Batys Qazaqstan, Qostanaı, Pavlodar, Soltústik Qazaqstan oblystarynda gıdrotehnıkalyq qurylystardy qalpyna keltirý jáne salý boıynsha 57 joba, onyń ishinde 13 jańa nysan qurylysy júzege asyrylyp jatyr. Búginde 57 nysannyń 40-y aıaqtalǵan, 221 shaqyrym qorǵanys bógetteri salynyp, nyǵaıtyldy, bul jumystyń 91%-yn quraıdy.
Aıta ketelik, Teplıchnoe aýylyndaǵy qorǵanys bógeti 1980 jyly paıdalanýǵa berilgen. Bastapqyda bógettiń uzyndyǵy 380 metr, ortasha eni 11 metr, ortasha bıiktigi 4 metr bolǵan. 2024 jylǵy sý tasqyny kezinde SQO Qyzyljar aýdanynyń aýmaǵynda jergilikti tabıǵı sıpattaǵy tótenshe jaǵdaı jarııalandy. Esil ózeniniń tasýy saldarynan Teplıchnoe aýylyndaǵy qorǵanys bógeti apatty jaǵdaıǵa tap boldy. 2024 jylǵy sý tasqynynan keıingi qalpyna keltirý jumystary kezinde bógettiń uzyndyǵy ulǵaıtyldy.
