Ekibastuz qalasynda bastalyp, Baıanaýylda jalǵasqan konferensııanyń eń basty májilisi oblys ortalyǵyndaǵy Dostyq úıinde ótti. Is-sharaǵa oblys ákiminiń orynbasary Aıgúl Málikova, Halyq qaharmany, general-leıtenant Baqytjan Ertaev qatysyp, jas urpaqty eńbekke baýlý, Otandy súıý degen ne, eli men jeri úshin adal eńbek etýge tárbıeleý jáne basqa da taqyryptarda taǵylymdy áńgimeler qozǵaldy.
– Igi is-sharanyń Baıanaýyl men Ekibastuz óńirinen bastaý alýy teginnen-tegin emes. Bizdiń óńir – talaı batyrlar men el qorǵaǵan erlerdi dúnıege ákelip, halqymyzdyń rýhan asqaqtatqan kıeli aımaq. Ata-babamyzdyń qaısarlyǵy men batyrlyǵy búgingi urpaqty birlikke, Otanyn súıýge úndeıdi. Memleket basshysy Qasym-Jomart Toqaev óz Joldaýynda: «Biz keshe kim bolǵanymyzdy umytpaımyz. Tól tarıhymyzǵa qurmetpen qaraımyz, Al keleshekte kim bolatynymyz tek óz qolymyzda ekenin jaqsy túsinemin», degen bolatyn. Al halqymyzdyń ata dástúri eldigimizdiń temirqazyǵy degen edi. Sondyqtan halqymyzdyń ata dástúri eldigimizdiń temirqazyǵy degim keledi, – dedi Aıgúl Qaıyrtasqyzy.
«Táýelsiz Qazaqstannyń halyq batyrlary» qoǵamdyq birlestiginiń tóraǵasy, general-leıtenant Baqytjan Ertaev jastarǵa Otan qorǵaý degenimiz neden bastalatynyn, otansúıgishtik degenimiz ne ekenin qarapaıym tilmen túsindirdi. Halyq qaharmany ár er-azamat úshin áskerge barý, azamattyq boryshyn óteý Otan aldyndaǵy eń úlken paryzy ekenin atap ótti.
Konferensııaǵa Qazaqstannyń Eńbek Eri, Sátbaev qalasynan kelgen shahter-prohodchık Tursynbek Mákishev, Eńbek Eri, Oral qalasyndaǵy Asan Taımanov atyndaǵy mektep-gımnazııanyń orys tili men ádebıeti pániniń muǵalimi Elmara Traısova, Eńbek Eri, Ekibastuz qalasynyń turǵyny Ryshat Ámirenov, oblystyq ardagerler keńesiniń tóraǵasy Rymtaı Shókeev syndy el aǵalary qatysyp, qarapaıym eńbek adamynyń búgingi qoǵamdaǵy orny, olarǵa degen qurmetti arttyrý týraly oı-pikirlerin ortaǵa saldy.
Konferensııa baǵdarlamasy aıasynda Pavlodar, Ekibastuz qalalary men Baıanaýyl aýdanynda 10-nan asa is-shara ótkizildi. Qatysýshylar Ekibastuz qalasyndaǵy bilim berý mekemelerin aralap, Q.Sátbaev atyndaǵy ınjenerlik-tehnıkalyq ınstıtýtynyń stýdentterimen kezdesti. Sondaı-aq «Samǵaý» ortalyǵynyń jáne «Bogatyr» kómir kenishiniń jumysymen tanysty. Al Baıanaýyl aýdanynda delegattar Máshhúr Júsip Kópeev kesenesinde, Sh.Aımanov atyndaǵy mektep-ınternatta, óńirdiń kıeli nysandary men mýzeılerinde boldy. Buǵan qosa konferensııa qonaqtary oblys ortalyǵyndaǵy Qabanbaı batyr atyndaǵy «Jas sarbaz» oblystyq mamandandyrylǵan lıseı-mektebine baryp, jas kýrsanttarmen kezdesti.
Pavlodar oblysy
