Foto: Úkimettiń baspasóz qyzmeti
Premer-mınıstr Oljas Bektenov salalyq mınıstrlikter men óńirlerdiń ákimdikterine birqatar tapsyrma berdi.
Aýyl sharýashylyǵy mınıstrligine óńir ákimdikterimen birlesip, forvardtyq kelisimsharttar sheńberinde Azyq-túlik korporasııasyna bıdaıdy ýaqtyly jetkizý mindettemelerin oryndaýdy qamtamasyz etý tapsyryldy. Bul qor elimizdiń ishki suranysyn óteýge baǵyttalady.
«Kelesi egin egý naýqanyna daıyndyqty qazirden bastaý kerek. Oblys ákimdikteri 2026 jyly keminde 2,3 mln tonna mıneraldy tyńaıtqysh sebýdi qamtamasyz etýleri qajet. О́nerkásip mınıstrligi eginshilerge qajetti tyńaıtqysh kólemin otandyq ónim óndirýshilermen aldyn ala pysyqtap alǵany jón. Ákimdikter tyńaıtqyshtardy jetkizý úshin ýaqtyly shartqa otyryp, qoımalarda olardyń jetkilikti qoryn qamtamasyz etsin», dedi Úkimet basshysy.
Aıta keteıik, Aýyl sharýashylyǵy mınıstrligi men «Báıterek» holdıngi 2026 jylǵy kóktemgi egis pen egin jınaý jumystaryn erte qarjylandyrýdy bastap ketti. Bul shara aýyl sharýashylyǵy óndirýshileriniń ýaqytyly daıyndalýyna jáne óndiristik prosesterdiń úzdiksiz júrýine múmkindik beredi.
Jalpy úılestirý jumysy Premer-mınıstrdiń orynbasary – Ulttyq ekonomıka mınıstri Serik Jumanǵarınge júkteldi.
