Saǵat 11:00-den 19:00-ge deıin mádenıet oshaqtarynda ótken irikteýge 1 000-nan astam adam qatysyp, ulttyq kınonyń bir bóligi bolýǵa nıet bildirdi. Qatysýshylardyń qatarynda oblys ortalyqtarynan bólek, aýdan-aýyldan kelgen turǵyndar da bar. Bul azamattardyń kıno ónerine degen yqylasyn, joǵary deńgeıdegi qyzyǵýshylyǵyn jáne de shyǵarmashylyq salada ózderin synap kórýge degen umtylysyn ańǵartady.
Qatysýshylardyń anketalary Saraptama keńesi tarapynan muqııat zerdelendi. Baǵalaý kezinde akterlik qabilet, sahnalyq obrazdy beıneleý sheberligi jáne kásibı damýǵa degen áleýet eskerildi. Kastıng qorytyndysy boıynsha 705 qatysýshy Kıno ortalyqtyń akterlik bazasyna engizildi.
«JARQYRA» kastıngi elimizde qýatty shyǵarmashylyq áleýettiń bar ekenin jáne túrli býyn ókilderiniń kıno salasynda kásibı jumys isteýge daıyn ekenin kórsetti. Ár qatysýshynyń shyǵarmashylyq kózqarasy, tártibi men shynaıy yntasy qýantady. Irikteý ońaı bolǵan joq. Saraptama keńesiniń aldynda kóptegen daryndy úmitkerdiń arasynan úzdikterin tańdaý mindeti turdy. Ulttyq kınony qoldaý memlekettik ortalyǵy otandyq kınoındýstrııany damytý, jańa esimderdi ashý jáne olardyń kásibı ósýine jaǵdaı jasaý baǵytyndaǵy júıeli jumystaryn jalǵastyra beredi», deıdi «Ulttyq kınony qoldaý memlekettik ortalyǵynyń» Basqarma tóraǵasy Qurmanbek Jumaǵalı.
Aıta keteıik, kastıngten ótken qatysýshylardyń anketalary Kıno ortalyǵynyń resmı saıtyna ornalastyrylady. Onlaın akterlik baza prodıýserler men kınokompanııalarǵa jańa esimderdi ashýǵa, daryndy akterlerdi tabýǵa jáne bolashaq fılmderge shyǵarmashylyq toptar qurýǵa múmkindik beretin zamanaýı quralǵa aınalmaq.
