Sýretti túsirgen – Valerıı BÝGAEV
Úkimet Arnaıy qordan 9,3 mlrd teńge bólý týraly sheshim qabyldaǵan. Búginde qarajat arnaıy esepshotqa tústi, qajetti kelisim-sharttar jasalyp, qazynashylyq organdarynda tirkeldi. Bólingen qarajattyń esebinen jobany iske asyrý qarqynyn arttyryp, 2026 jyldyń shilde aıynda tolyq aıaqtaý josparlanyp otyr.
Bastapqy kestede jumystar bıylǵy qarasha aıynda aıaqtalady dep josparlanǵan bolatyn. Alaıda jobanyń qalǵan bóligine qajet 9,3 mlrd teńgeni qarjylandyrý qajettiligine baılanysty merzimi ózgertildi. Qaıta jańartý jobasy ushý-qoný jolaǵyn 45 metrden 60 metrge deıin keńeıtýdi, qozǵalys joly men áýejaı perronyn qalpyna keltirýdi, zamanaýı jaryqtandyrý, beınebaqylaý, drenaj júıelerin ornatýdy qamtıdy. Jumystar áýejaıdyń sáıkestik sertıfıkatyn saqtaý qajettiligine baılanysty oryndalady. Bas merdiger – «Kyrylys Group RK» JShS. Jobanyń jalpy quny – 16,4 mlrd teńge.
О́ńirlik jolaýshylar kóligi jáne avtomobıl joldary basqarmasynyń málimetinshe, búginde josparlanǵan jumystyń 47%-y oryndalǵan. Aýmaǵy 178 myń sharshy metr bolatyn asfalt-beton jabyny frezerlenip, jer qazý jumysy men drenaj júıesin ornatý aıaqtalǵan. Uzyndyǵy 16,2 km bolatyn qorshaýdyń 95%-y ornatyldy. Jaryqtandyrý, beınebaqylaý júıelerin ornatý jalǵasyp jatyr. Merdiger uıym 1,4 mlrd teńgeden astam somaǵa materıal men jabdyq satyp alǵan. 35 myń tonna qum-qıyrshyq tas qospasy jetkizilip, qýattylyǵy saǵatyna 240 tonna asfalt-beton zaýyty ornatylǵan.
Oblys ákimi Asaıyn Baıhanov Pavlodar áýejaıynyń ushý-qoný jolaǵyn qaıta jańartý óńirdegi strategııalyq mańyzy bar ınfraqurylymdyq joba ekenin atap ótti.
«Jańartylǵan ushyp-qoný jolaǵy ushý qaýipsizdigin arttyrýǵa, ártúrli sanattaǵy áýe kemelerin qabyldaýǵa múmkindik beredi. Jobany iske asyrý ınvestısııa tartýǵa, áýe reısteriniń baǵytyn ulǵaıtýǵa jaǵdaı jasaıdy. Bul óńirdiń kólik-logıstıka áleýetin nyǵaıtýdyń mańyzdy kezeńi bolady», dedi aımaq basshysy.
Pavlodar oblysy
