Foto: ru.uefa.com
Kezdesý 6 qarasha kúni Qazaqstan ýaqytymen 01:00-de bastalady. Qos tarap áıgili «San-Sıro» alańyndaǵy match aldynda baspasóz jıynyn ótkizip, BAQ ókilderiniń saýaldaryna jaýap berdi.
«Qaırattyń» bas bapkeri Rafael Ýrazbahtın azýly komandamen bolatyn oıyn qurama úshin mańyzdy synaq ekenin atap ótti.
«San-Sıro» – aty ańyzǵa aınalǵan arena. Men munda segiz jyl buryn uldarym jáne akademııanyń balalarymen birge kelgenmin. Mılanda kóptegen otandastarymyzdy kórip jatyrmyz. Árıne, bul – zor qýanysh.
Biz qarsylastarymyzdyń myqtylyǵyn jáne «Inter» jankúıerleriniń qoldaýy qaı deńgeıde ekenin bilemiz. Men mundaı kúshti qarsylasqa qarsy oınaımyn dep eshqashan oılaǵan emespin. Komanda úshin mańyzdy synaq bolatyny túsinikti. Dese de, biz bar kúsh-jigerimizdi kórsetýge daıynbyz», dedi Rafael Ýrazbahtın.
Bapkerdiń pikirin «Qaırat» qorǵaýshysy Egor Sorokın de qoldaǵan.
«Qıyn match bolatyny belgili. Biz aıanyp qalmaı, oıyn barysyn baqylaýda ustaýǵa tyrysamyz. «Inter» shabýylshylary da biz sekildi qarapaıym adam. Onyń ústine qorǵanysta jalǵyz men bolmaıtynym da túsinikti bolsa kerek», dedi Egor Sorokın.
О́z kezeginde «Interdiń» bas bapkeri Krıstıan Kıvý Chempıondar lıgasy aıasyndaǵy kez kelgen oıyn upaı úshin tartys ekenin jetkizdi.
«Bul - Chempıondar lıgasy. Aldaǵy matchqa basqa oıyndarǵa qalaı kóńil bólsek, sol deńgeıde qaraımyz. Sondyqtan 3 upaı úshin barymyzdy sala kúresemiz», dedi «Interdiń» bas bapkeri.
Al «Interdiń» qorǵaýshysy Karlos Aýgýsto upaı enshileýmen qatar soǵylǵan dop sany boıynsha da alǵa shyǵýǵa tyrysatynyn atap ótti.
«Chempıondar lıgasynda múmkindiginshe jıi jeńiske jetý, upaı jınaý jáne gol aıyrmasy mańyzdy ekenin bilemiz. Kez kelgen match ońaıǵa túspeıdi. Biz óz alańymyzda ekenimizdi eskersek, basymdyq bar. Qarsylas ta Mılanda uıymdasqan oıyn kórsetýge umtylady. Biz de úsh upaı alý úshin qoldan kelgenniń bárin jasaımyz», dedi Karlos Aýgýsto.
«Inter» – «Qaırat» kezdesýin «Qazaqstan» ulttyq arnasy tikeleı efırde kórsetedi.
