Birneshe jyl buryn parıjdik boıjetken ınternetten Qazaqstan týraly jazba oqyp, óz ómirinde betburys jasaıdy. Sol sátten bastap onyń qazaq eline degen erekshe qyzyǵýshylyǵy oıanady. Onyń esimi – Elız Paketo.
Birde ol elimizdi kózben kórip, tamashalaýǵa Kaspıı jaǵalaýyndaǵy Aqtaý qalasyna keledi. Bul qalada halyqtyń basym bóligi qazaq tilinde sóıleıtinin baıqaǵan ol ana tilimizdi úırenýge nıettenedi. «Maǵan qazaq tiliniń áýezi qatty unady. Adamdarmen shynaıy baılanys ornatý úshin olardyń ana tilin bilý mańyzdy dep oılaımyn», degen oıǵa kelgenin aıtady.
Onyń aıtýynsha, basty qıyndyq – qazaq tilin úıretetin sapaly resýrstyń azdyǵy. «Kóp materıal orys tilinde, keıbiri túrik tilinde. Al aǵylshyn tilindegi materıaldar óte az, fransýz tilinde múlde joq dese de bolady», deıdi ol. Soǵan qaramastan, qazaq tilin úırenýdi toqtatpapty.
«Eń úlken ári keremet tosynsyı qazaq halqynyń yntasy men qoldaýy boldy. Keıingi kezde, ásirese beınejazbalarymnyń astyndaǵy pikirlerde olardyń qoldaýy meni odan ári qulshynýǵa, bar kúshimdi salýǵa jigerlendirdi. Qazaq tili men mádenıetine degen qyzyǵýshylyǵym arqyly tamasha adamdarmen tanystym. Bul tildi úırený meni qazaq mádenıetine birtaban jaqyndatty. Tipti qazaq tilin úırengisi keletin ózge adamdardan da habarlamalar alyp júrmin. Olar menen keńes nemese úırenýge arnalǵan materıaldar suraıdy, al men olarǵa kómektesýge tyrysamyn», deıdi ol áserlenip.
Fransýz qyzy Elız Paketo Parıjdegi qazaq mádenı ortalyǵyna jıi baryp turady eken. Senbi kúnderi bolatyn qazaq tili sabaqtaryna qatysyp, til ıgerý men sóıleý daǵdysyn damytady. Osy ortalyqta ol kóptegen dos taýyp, qazaq mádenıetimen tereńirek tanysady.
Qazaq tilin úırengisi keletinderge ol bylaısha keńes beredi: «Qoryqpańyzdar! Basynda qıyn kórinýi múmkin, biraq qazaqtar sizdiń árbir talpynysyńyzdy joǵary baǵalaıdy jáne kómektesýge daıyn. Qazaq tili — ádemi ári úırenýge turarlyq til. Grammatıkasy kúrdeli bolyp kóringenimen, ýaqyt óte onyń logıkalyq turǵydan júıeli ekenin túsinesiz. Tildi úırený – marafon, al marafondy aıaqtaǵan saıyn siz jańa mádenıettiń esigin ashasyz».
Parıjde turatyn Elızdiń aldaǵy jospary da tamasha. Ol qazaq tilin jaqsy meńgergen soń, qazaqtildilerge fransýz tilin úıretýdi, eki tilde kitaptar shyǵarýdy, qazaq tilin úırengisi keletinderge arnap fransýz jáne aǵylshyn tilderindegi oqý quraldaryn qurastyrýdy, sondaı-aq Fransııa men Qazaqstan arasyndaǵy mádenı jobalarǵa qatysýdy kózdeıtinin aıtady. «Men eki el arasyndaǵy mádenı kópir bolǵym keledi. Al qazaq tili – osy kópirdiń eń berik irgetasy», deıdi Elız senimmen.
