Foto: kazfootball.kz
«Almaty – alystaǵy ǵalamsharda kishkentaı ǵana núkte. Biraq Qyrǵyzstan men Qytaı shekarasyna jaqyn ornalasqan. «Qaırat» komandasy «San-Sıroǵa» jetý úshin shamamen 7000 shaqyrymdy eńserip, segiz saǵattan astam áýede boldy. Mılanǵa úmitsiz qurban retinde kelgendeı kóringenimen, bári basqasha órbidi», dep jazady Gazzetta.it.
Italıa jýrnalısteri atap ótkendeı, almatylyqtar qarsylastarymen erkin kúresip, sońyna deıin tabandylyq tanytty.
«San-Sıroda» «Interge» qarsy tolyq 90 mınýt boıy tótep berý – kez kelgen komanda úshin qıyn. Degenmen «Qaırat» «Interdi» biraz ábigerge saldy. Bul eýropalyq keshte Kıprdiń «Pafosy» men Ázerbaıjannyń «Qarabaǵy» sensasııa jasaǵandaı, «Qaırat» ta qurmetke laıyq oıyn kórsetti», delingen maqalada.
Gazzetta.it atap ótkendeı, matchta «Qaırattyń» oıynshysy 2008 jyly týǵan Dastan Satpaev erekshe kózge tústi. Ol qarsylastyń dobyn tartyp alyp, alystan baǵyttaǵan soqqysymen qaqpa mańdaıshasyn shaıqady. Basylymnyń aıtýynsha, dál osy oıynynan keıin «Chelsı» klýby jas qazaqstandyq fýtbolshymen 2,5 mıllıon eýroǵa kelisimshart jasasqany tegin emes.
Birinshi taımnyń sońynda ıtalııalyq komandanyń oıynshysy Laýtaro Martınes alǵash bolyp esep ashty. Ekinshi taımda «Qaırat» oıynshysy Ofrı Aradtyń basymen soqqan dobynyń arqasynda esepti teńesti – 1:1.
«Sol sátte «San-Sıroda» 1700 qazaqstandyq jankúıerdiń qýanyshyn sózben jetkizý qıyn boldy», dep jazady portal.
Keıin match taǵdyryn Karlos Aýgýstonyń dál soqqysy sheshti – 2:1. Kıvý Markýs Tıýramdy alańǵa shyǵarǵanymen, «Qaırat» sońǵy mınýttarǵa deıin des bermedi.
«Eń bastysy «Inter» kóshbasshylyqty saqtap qaldy, al «Qaırat» Eýropanyń qurmetine bólendi», dep túıindedi Gazzetta.it basylymy.
Osylaısha, ıtalııalyq BAQ almatylyq klýbtyń oıyn mánerin, jigeri men kásibı deńgeıin joǵary baǵalap, «Qaırattyń» naǵyz qaırat kórsetkenin atap ótti.
