«Búginde sport – ult mádenıeti men densaýlyǵynyń bir bóligi ǵana emes, sonymen qatar dıplomatııanyń, birliktiń jáne tehnologııalyq progrestiń qýatty quraly. Qazaqstan sport ınfraqurylymyn damytý, zamanaýı nysandar salý jáne halyqtyń sportqa qoljetimdiligin arttyrý baǵytynda júıeli saıasat júrgizip keledi. 2026 jyly elimizde frıstaıl, júzý, stend atý, jeńil atletıka, mánerlep syrǵanaý jáne taekvondodan Álem kýbogi kezeńderi men Gran-prı syndy birqatar iri halyqaralyq jarys ótedi. Bul týrnırler Olımpıada maýsymymen tuspa-tus kelip, álemniń úzdik sportshylary Qazaqstanda bas qosatyn mańyzdy sporttyq oqıǵa bolmaq», dedi Erbol Myrzabosynov.
Is-sharaǵa Azııa men Taıaý Shyǵys elderiniń sport salasyna jaýapty vedomstvo basshylary, halyqaralyq uıymdar men sport federasııalarynyń ókilderi qatysty. Jıyn «Dástúrden jańashyldyqqa: Azııa yntymaqtastyq jónindegi dıalog elderindegi sporttyń bolashaǵy» taqyryby aıasynda ótti.
Azııadaǵy ózara is-qımyl jónindegi dıalog – Azııa men Taıaý Shyǵystyń 35 memleketiniń ókilderi qatysatyn memleketaralyq forým. Forým 2002 jyly saıası, ekonomıkalyq jáne gýmanıtarlyq yntymaqtastyqty damytý maqsatynda qurylǵan.
Sondaı-aq Erbol Myrzabosynov «Reseı – sport derjavasy» atty XIII halyqaralyq sport forýmynyń plenarlyq otyrysynda da sóz sóıledi. Mınıstr elimizdiń IýNESKO-nyń materıaldyq emes mádenı mura tizimine engizilgen ulttyq sport túrlerin, onyń ishinde qazaq kúresi, toǵyzqumalaq, asyq atý jáne qusbegilik túrlerin belsendi túrde nasıhattaıtynyn atap ótti.
Aıta keteıik, Ulttyq sport túrleriniń keń kólemde nasıhattalýyna 2024 jyly Astanada ótken 5-shi Dúnıejúzilik kóshpendiler oıyndary zor septigin tıgizgen.
