Bastamaǵa sáıkes joba kezeń-kezeńimen júzege asyrylady. Onyń aıasynda Qazaqstannyń táýelsiz JI-haby qurylady. Ony Freedom Holding Corp. basqaryp, NVIDIA-nyń ozyq esepteýish tehnologııalarymen jabdyqtalady. Mınıstrlik óz tarapynan aýqymdy AI-ınfraqurylymdy ornalastyrý men paıdalanýǵa qolaıly jaǵdaı jasaıdy, sondaı-aq ınjenerler men ǵalymdardy daıarlaýǵa arnalǵan JI akademııasy men ǵylymı-zertteý zerthanasyn qurý syndy bastamalardy qoldaıdy.
Jobaǵa 2 mıllıard dollar ınvestısııa tartý josparlanyp otyr. Ol qýattylyǵy 100 MVt bolatyn qoljetimdi energııamen Qazaqstan aýmaǵynda júzege asyrylady. Freedom Holding Corp. jobanyń negizgi ınvestory jáne operatory bolýdy josparlap otyr.
Seriktestik Qazaqstan men Ortalyq Azııanyń qarqyndy damyp kele jatqan sıfrlyq ekonomıkasy úshin qajetti JI-ekojúıesin damytýǵa, ınnovasııalardy ilgeriletýge jáne kadrlardy daıarlaýǵa degen ortaq umtylysyn kórsetedi.
«NVIDIA kompanııasymen yntymaqtastyq - Qazaqstannyń jasandy ıntellekt salasyndaǵy ulttyq strategııasyn júzege asyrýdaǵy mańyzdy qadam. Biz táýelsiz AI-ekojúıesiniń irgetasyn qalyptastyryp jatyrmyz. Bul ekonomıkamyzdy nyǵaıtyp, básekege qabilettilikti arttyrady, búkil óńir úshin jańa múmkindikterdi ashady», - dedi Qazaqstan Respýblıkasynyń Premer-mınıstriniń orynbasary, Jasandy ıntellekt jáne sıfrlyq damý mınıstri Jaslan Mádıev.
«Qazaqstannyń álemdik jasandy ıntellekt naryǵyndaǵy pozısııasyn nyǵaıtýǵa baǵyttalǵan osy aýqymdy bastamanyń bir bóligi bolǵanymyzǵa qýanyshtymyz. Bizdiń tájirıbemizdi NVIDIA-nyń ozyq tehnologııalarymen jáne Mınıstrliktiń strategııalyq kózqarasymen biriktire otyryp, jasandy ıntellekt salasyndaǵy ınnovasııalardyń damýy men salany Ortalyq Azııa óńirinde damytýǵa atsalysamyz», - dep málimdedi Freedom Holding Corp. kompanııasynyń bas atqarýshy dırektory Tımýr Týrlov.
