Dırıjer Djýzeppe Akýavıvanyń basqarýyndaǵy Genýıadaǵy Karlo Felıche teatry orkestriniń súıemeldeýimen Baǵdat Ábilhanov nemis romantızmi skrıpka mýzykasynyń jaýhary – Maks Brýhtyń Orkestr men skrıpkaǵa arnalǵan №1 konsertti, sol mınor, op. 26 oryndady.
«Áýenniń ásemdigi, emosııalyq aıqyndylyq pen mýzykalyq oryndaýshylyqtaǵy mánerlilik qatty baǵalanatyn Italııa jerinde osynaý keremet týyndymen óner kórsetý men úshin zor mártebe. Brýhtyń týyndysy romantıka rýhyna toly, ol barlyq qatysýshynyń – ártisterdiń de, tyńdarmandardyń da júreginen oryn aldy. Osy sátti paıdalana otyryp, meni shaqyrǵandary úshin jáne nátıjeli áriptestik úshin maestro Akýavıva men Kamolı teatryna shynaıy alǵysymdy bildiremin», dep atap ótti Baǵdat Ábilhanov.
Álemdegi eń tanymal ári súıikti skrıpkalyq konsertterdiń biri talǵampaz ıtalııalyq kórermenderdi tańǵaldyrdy. Kópshilik bizdiń ártiske tolassyz qoshemet jaýdyrdy. Kesh aıaqtalǵannan keıin klassıkany baǵalaıtyn jandar áleýmettik jelilerdegi paraqshalarda oń pikirler qaldyryp, oryndaýshynyń sheberligine jáne qazaq skrıpka mektebiniń joǵary deńgeıine tańdanystaryn jetkizdi.
«Maks Brýhtyń konserti solıske óz darynynyń barlyq qyryn tolyq ashýǵa jáne tehnıkalyq qýat pen emosııalyq ótkirliktiń erekshe úılesimin pash etýge múmkindik berdi. Tanymal adajıo baýrap aldy, al fınaldyń dramalyq qýaty naǵyz tańdanysty týǵyzdy. Bul bizdiń teńiz jaǵasyndaǵy qalamyzdyń romantıkalyq atmosferasy men skrıpka úni arasyndaǵy tamasha mýzykalyq dıalog boldy», dep pikir bólisti kórermen Mıkele Brýssone.
Tyńdarman Lýıza Gallo da áserin jetkizdi: «Baǵdat Ábilhanovtyń oryndaýy tehnıkalyq jaǵynan minsiz bolyp qana qoıǵan joq, sonymen qatar ol jigerli estildi. Paıymdaý shynaıylyq pen tańǵalarlyq jylylyqqa ulasty. Sondyqtan biz osynaý shúbásiz jetistiktiń kýási bolǵanymyzǵa shyn júrekten qýanyshtymyz».
