Is-sharaǵa Týrızm jáne sport mınıstri Erbol Myrzabosynov, Ulttyq Sýrdlımpıada komıtetiniń prezıdenti Serik Sapıev qatysty.
Rásim barysynda Mınıstr Qazaqstannyń Memlekettik Týyn ulttyq qurama komandasyna saltanatty túrde tabys etip, sportshylarǵa sáttilik pen jarqyn jeńister tiledi.
«Jazǵy Sýrdlımpıada oıyndary — eldiń sporttyq áleýetin kórsetetin mańyzdy alań. Sizderdiń erik-jigerlerińiz ben qaısar minezderińiz adam múmkindiginiń sheksiz ekenin dáleldeıdi. Mıllıondaǵan adamdar sizderdiń tabandylyqtaryńyzdan shabyt alyp, ómir synaqtaryn eńserýdi úırenedi. Búgin tabystalatyn Tý — el birligi men jeńistiń sımvoly. Sizderdiń halyqaralyq arenada elimizdiń abyroıyn asqaqtatyp, kók baıraǵymyzdy bıikte jelbiretetinińizge senimdimin», – dedi Erbol Myrzabosynov.
Mınıstr óz sózinde elimizde sportshylardyń sapaly daıyndalýy úshin barlyq jaǵdaı jasalyp jatqanyn da atap ótti.
«Búginde elimizde sportshylardyń sapaly daıyndalýy úshin barlyq múmkindik jasalǵan. 2029 jylǵa deıin 113 jańa sport nysanyn salý jáne 26 nysandy jańǵyrtý josparlanyp otyr. Almaty oblysyndaǵy Olımpıadalyq daıyndyqtyń zamanaýı bazasynda 2 300 sportshy bir mezette jattyǵa alady. Sonymen qatar, óńirlerde «100 jyldam salynatyn sport nysany» jobasy tabysty iske asýda – sońǵy bir jylda 25 jańa keshen paıdalanýǵa berildi. Elordada salynyp jatqan Ulttyq sport ýnıversıteti bolashaqta sport salasyndaǵy kadrlardy úzdiksiz daıarlaý júıesin qalyptastyrýǵa múmkindik beredi», – dedi mınıstr.
Týdy tabys etý qurmeti sýrdo dzıýdodan Qazaqstan Respýblıkasynyń sport sheberleri, XXIV jazǵy Sýrdlımpıada oıyndarynyń júldegerleri Aıdos Túgelbaev pen Anna Kramorovaǵa buıyrdy.
«Búgin – men úshin erekshe kún. Sýrdlımpıadada Qazaqstannyń kók týyn alyp shyǵý – úlken jaýapkershilik ári zor mártebe. Bul – ár sportshynyń armany. Biz el namysyn qorǵap, jeńis úshin bar kúshimizdi salamyz», – dedi Aıdos Túgelbaev.
Aıta ketsek, XXV jazǵy Sýrdlımpıada oıyndary 15–26 qarasha aralyǵynda Japonııanyń astanasy Tokıo qalasynda ótedi. Baıraqty dodada 80 elden shamamen 3 000 sportshy 21 sport túrinen baq synap, 223 medal jıyntyǵy sarapqa salynady. Qazaqstannan 78 sportshy 8 sport túrinen qatysady: jeńil atletıka, erkin jáne grek-rım kúresi, badmınton, ústel tennısi, júzý, dzıýdo jáne taekvondo.
