Málimdemede kórsetilgendeı, depýtat aıtqan másele buǵan deıin Qazaqstan Jazýshylar odaǵy Basqarmasy tarapynan birneshe márte kóterilgen, keıbiri sheshimin taýyp, keıbiri júıeli túrde júzege asyp jatyr.
«Osydan eki jyl buryn, 2023 jyly Memleket basshysy Qasym-Jomart Toqaev Jazýshylar odaǵynyń tóraǵasy Mereke Qulkenovti qabyldaǵanda osy máselelerge nazar aýdarǵan bolatyn. Memleket basshysy jas aqyn-jazýshylardyń shyǵarmashylyǵyna erekshe nazar aýdarý qajet ekenin atap ótip, memleket tarapynan qalamgerlerdi qoldaý sharalary jalǵasa beretinin aıtty. Bul qoldaýdy jas qalamgerler búginge deıin turaqty túrde sezinip keledi. Sózimizdiń dáleli retinde jyl saıyn berilip kele jatqan memlekettik «Daryn» jastar syılyǵyn, «Jas aqyn-jazýshylarǵa arnalǵan Prezıdenttik arnaýly ádebı syılyqty», «Aıboz» ulttyq ádebı syılyǵyn aıtsaq ta jetip jatyr.
Búginde Odaq Prezıdent Ákimshiligimen, Úkimetpen, Mádenıet jáne aqparat mınıstrligimen, oblystyq ákimdiktermen, sondaı-aq shet memlekettermen ózara birqatar mańyzdy jobalardy júzege asyryp otyr. Sondyqtan da «úkimettiń quzyrly oryndarynda zamanaýı ádebıet pen mádenıettiń ıisi murnyna barmaıtyndar ádebıetti qoldaýda nemquraıdylyq pen sharasyzdyq tanytyp otyr» deýińiz – orynsyz.
Sonymen qatar sizdiń «Úkimet pen ádebıet arasyndaǵy mádenı únqatysýdy júıeli dıalogtik platforma retinde bekitý» degen usynysyńyz da birjaqty pikir sııaqty. Sebebi qalamger qaýymy bılikpen dıalog júrgizýmen ýaqyt ótkizse ádebıetti kim jasamaq?
Qazaq ádebıetiniń bolashaǵy – jas býynda ekeni daýsyz. Sol sebepti, Qazaqstan Jazýshylar odaǵy jas talanttardy qoldaý men ádebı úderisti jańa baǵytta damytýǵa basa nazar aýdaryp keledi. Atap aıtqanda, «Qazaqstan Jazýshylar odaǵy músheligine úmitker» jobasy jalǵasyp, 20 jasqa deıingi jastardy yntalandyrý maqsatynda túrli shyǵarmashylyq baıqaýlar, sheberlik dáristeri men ádebı keshter turaqty túrde uıymdastyrylýda. Sonymen qatar balalar ádebıetin damytý, jas býynnyń rýhanı ósýin, olardy ulttyq qundylyqtar men mádenıetke baýlý, balalarǵa arnalǵan shyǵarmalardy nasıhattaý, sol arqyly jalpy ádebıettiń damýyna úles qosý maqsatynda Jazýshylar odaǵy Halyqaralyq «Ertóstik» Balalar ádebı syılyǵyn taǵaıyndady. Bul joba endi turaqty túrde iske asatyn bolady. Buǵan qosa, byltyr Qazaqstan Jazýshylar odaǵynyń uıymdastyrýymen júzege asqan «Almatynyń jas jazýshysy» jobasyn endigi jyldan bastap Oqý-Aǵartý mınıstrliginiń qoldaýymen búkil Qazaqstan aýmaǵynda «Qazaqstannyń jas jazýshysy»ataýymen ótkizý josparlanyp otyr. Mektep jasyndaǵy jas talanttardy mektep qabyrǵasynan ádebıetke baýlý bizdiń qasıetti boryshymyz», delingen odaq málimdemesinde.
Odaq júzege asyrylyp jatqan birneshe jobany ataı kele, depýtattyq saýalda kóterilgen qazaq ádebıetiniń keleshegine qatysty máseleler – Qazaqstan Jazýshylar odaǵynyń kún tártibindegi basty baǵyttarmen, atqarylǵan, atqarylyp jatqan jumystarmen tolyq úndesetindigin aıtady.
