Odan keıin Túrkııanyń Alanııa qalasynda medıa salasy mamandarynyń V Halyqaralyq keńesinde belgili kúıshi, ustaz Janǵalı Júzbaı Ysmaıyl Gaspraly atyndaǵy syılyqpen marapattaldy. Bul syılyq túrki áleminiń birligi men mádenı baılanysyn nyǵaıtý maqsatynda beriledi. Halqymyzdyń kúı ónerine eren eńbek sińirip júrgen Janǵalı Júzbaı álemniń 41 memleketinen 310 medıa salasynyń mamandary qatysqan halyqaralyq keńeste Ysmaıyl Gaspraly syılyǵymen marapattalýy – ulttyq dombyra aspabynyń bedelin halyqaralyq deńgeıge kóterý bolsa, qazaq mádenıetin ózgeshelep turatyn kúı ónerine qurmet dep qabyldadyq. Buǵan deıin syılyq «Túrki dúnııasyna sińirgen eńbegi úshin» dep atalatyn. Saıasatkerler, ǵalymdar, ónerpazdar men BAQ ókilderine berilip kele jatqan marapat bıyldan bastap ǵalymdar úshin «Ysmaıyl Gaspraly syılyǵy» retinde taǵaıyndalyp otyr.
Kezinde bul syılyqpen dúnıe júzine tanymal tulǵalar marapattalǵany belgili. Máselen, Túrkııanyń eks-syrtqy ister mınıstri, Soltústik Makedonııa parlamentiniń tóraǵasy, Halyqaralyq TÚRKSOI uıymynyń bas hatshysy, belgili BAQ ókilderi, túrki dúnııasyna eńbek sińirip júrgen ǵalymdar men ónerpazdar bar.
Qazaq óneri men mádenıetiniń ózgeshe sıpaty dombyra men kúı ónerine qurmetimiz artqan saıyn básimiz halyqaralyq deńgeıde de joǵarylary anyq. Elimizde Ulttyq dombyra kúni bar, Ankarada Táttimbet eskertkishi tur, onyń ónerin ustaǵandar mundaı marapat alǵany – ult mádenıetiniń upaıy desek artyq emes.
