«Máskeýge jasalatyn saparymnyń barysynda kún tártibinde turǵan basty tarmaqtardyń biri – Qazaqstan men Reseı arasyndaǵy qatynastardy jan-jaqty strategııalyq áriptestik pen odaqtastyq deńgeıine kóterý týraly Deklarasııaǵa qol qoıý bolmaq. Bul qujat, sózsiz, ekijaqty baılanystardyń jańa dáýirin ashyp, ózara senimniń buryn-sońdy bolmaǵan deńgeıin jáne barlyq baǵyt boıynsha tyǵyz yntymaqtastyqqa ázirligimizdi aıǵaqtaıdy», deıdi Prezıdent.
Reseı Federasııasy – elimizdiń eń iri syrtqy saýda seriktesteriniń úshtigine kiredi. О́z kezeginde, Qazaqstan da Reseıdiń negizgi bes saýda seriktesiniń qatarynda. Eki el arasyndaǵy taýar aınalymy turaqty túrde ósip, 30 mıllıard dollarǵa jýyqtap keledi.
Memleket basshysynyń aıtýynsha, ınvestısııalyq yntymaqtastyq ta qarqyndy damyp jatyr. Reseılik ınvestorlar Qazaqstan ekonomıkasyna qarjy quıý kólemi boıynsha kóshbasshylardyń biri bolyp sanalady. Bul elimizdiń joǵary ınvestısııalyq tartymdylyǵyn, berik iskerlik baılanystar men memleketter arasyndaǵy ózara senimdi kórsetedi.
«Qazaqstan men Reseıdiń ónerkásiptik kooperasııasynyń negizin jalpy ınvestısııa kólemi 50 mıllıard AQSh dollarynan asatyn 170-ten astam birlesken joba quraıdy. «Sıbýr», «Gazprom», «Lýkoıl», «EvroHım» sııaqty iri reseılik kompanııalardyń qatysýymen elimizde polıetılen, býtadıen, mıneraldyq tyńaıtqyshtar jáne basqa da joǵary tehnologııalyq ónim óndiretin zaýyttar salynyp jatyr. «Tatneft» kompanııasymen birlesip avtokólik shınalarynyń óndirisi jolǵa qoıylǵan, al «KAMAZ»-ben júk kólikterine arnalǵan bólshekter shyǵarylady.
Jalpy alǵanda, Qazaqstanda reseılik kapıtaldyń qatysýymen 20 myńnan astam kompanııa tabysty jumys istep keledi. Bul jaı ǵana san emes – bul ózara tıimdi seriktestiktiń naqty nátıjesi. Sonyń arqasynda jańa óndirister ashylyp, ondaǵan myń jumys orny qurylyp, ozyq tehnologııalar transferi júzege asyp, óńirler men halyqtar arasyndaǵy baılanystar nyǵaıyp keledi», deıdi Q.Toqaev.
Sonymen qatar Prezıdent eki el yntymaqtastyǵynda energetıka salasy erekshe oryn alatynyn atap ótti.
«Birlesken kúsh-jiger arqyly biz reseılik energııa resýrstaryn Qytaı men Ortalyq Azııa elderine úzdiksiz tranzıtteýdi qamtamasyz etip otyrmyz. Sondaı-aq iri energetıkalyq nysandardy salý jáne jańǵyrtý jumystary júrgizilip jatyr. Bul baǵyttaǵy negizgi jobalardyń biri – «Rosatom» jetekshilik etetin halyqaralyq konsorsıýmnyń qatysýymen Qazaqstanda alǵashqy atom elektr stansııasyn salý bolmaq», deıdi el Prezıdenti.
