Aıta ketken jón, eki el arasyndaǵy berik ári dostyq baılanystardyń sımvoly retinde bıyl Astanada «Qazaqstan men Reseıdiń Máńgilik dostyq Alleıasy» saltanatty túrde ashyldy. Jaqyn arada Máskeýde «Qazaqstan-Reseı dostyǵy skveri» ashylady.
«Mýzeıler, kitaphanalar, teatrlar, kórkem galereıalar men kınematografıster arasyndaǵy yntymaqtastyq nyǵaıyp keledi. Jastarǵa, ǵylym men sportqa arnalǵan birqatar ortaq forýmdardy ótkizý josparlanǵan.
Ǵylymı-bilim berý salasyndaǵy ózara is-qımylǵa erekshe mán berilip otyr. Joǵary tehnologııalyq jobalardy bilikti mamandarsyz júzege asyrý múmkin emes. Bilim berý – jasandy ıntellekt pen jappaı sıfrlandyrý dáýirinde, basty kapıtal – bilim bolyp sanalatyn jańa zamannyń zııatkerlik irgetasyn qalyptastyrady», dep jazdy Prezıdent óz maqalasynda.
Memleket basshysynyń aıtýynsha, qazirgi ýaqytta Qazaqstanda Reseıdiń toǵyz jetekshi joǵary oqý ornynyń fılıaldary tabysty jumys istep tur.
«Sońǵy jyldary bilim salasyndaǵy áriptestik jańa deńgeıge kóterildi: Astanada MGIMO fılıaly ashyldy, al Ombyda ál-Farabı atyndaǵy Qazaq ulttyq ýnıversıtetiniń fılıaly iske qosyldy. Bul – sheteldik joǵary oqý ornynyń Reseı aýmaǵyndaǵy alǵashqy ókildigi. Munyń ózi tek kadr daıarlaý men akademııalyq baılanystardy nyǵaıtý emes, sonymen qatar senim men shynaıy strategııalyq jaqyndasýdyń berik kópiri. Sonymen birge, Almaty qalasynda Reseıdiń «Sırıýs» mektebiniń fılıalyn salý týraly mańyzdy sheshim qabyldandy», deıdi el Prezıdenti.
