Monografııany Qaraǵandydaǵy «Buketov University» ulttyq joǵary oqý ornynyń ǵalymdary daıyndaǵan. Osy ýnıversıtet delegasııasy jaqynda «QS Higher Ed Summit: Asia Pacific 2025» halyqaralyq forýmyna qatysty. Aýqymdy jıyn Azııa-Tynyq muhıty aımaǵyndaǵy joǵary bilim berýdiń damý úrdisteri, ınnovasııalar jáne halyqaralyq yntymaqtastyq máselelerine arnaldy. Osy keleli is-shara aıasynda uıymdastyrylǵan «Korea Foundation» alańynda «Qazaqstandaǵy koreılerdiń tarıhı-mádenı murasy» atty ǵylymı monografııany tanystyrdy.
Sondaı-aq delegasııa Seýldegi Sýngsın áıelder ýnıversıtetinde (Sungshin Women’s University) resmı kezdesý ótkizip, ózara túsinistik týraly memorandýmǵa qol qoıdy. Qujatta ǵylymı zertteýler júrgizý, akademııalyq utqyrlyqty damytý, professorlyq-oqytýshylyq quram men stýdentter arasyndaǵy áriptestik baılanystardy keńeıtý baǵyttary qamtyldy. Sapar aıasynda qazaq ǵalymdarynyń eńbekteri Hanken ulttyq ýnıversıtetine jáne Sývon ýnıversıtetiniń professory Pak Hvanǵa tabystaldy.
