Forým qonaqtary úshin mazmundy iskerlik baǵdarlama usynylǵan. Onda sıfrlandyrý, kólik jáne logıstıka, ónerkásip pen energetıka salalaryndaǵy ekijaqty yntymaqtastyqty nyǵaıtý, aımaqtarda joǵary tehnologııalyq jumys oryndaryn qurýǵa baǵyttalǵan seriktestik múmkindikteri, atomdyq jáne dástúrli energetıka salalary boıynsha mamandar daıarlaý, zamanaýı agrotehnologııalardy oqytý sekildi ózekti taqyryptar talqylanyp jatyr.
«Jyl saıyn ótkiziletin forým – Qazaqstan men Reseı arasyndaǵy strategııalyq seriktestikke negizdelgen ózara senim men tıimdi yntymaqtastyqtyń beriktiginiń aıǵaǵy. Eki el arasynda ózara saýda-sattyq kólemin ulǵaıtý jáne ınvestısııalyq yntymaqtastyqty keńeıtý baǵytynda jumystar áli de jalǵasady. Sondaı-aq kóptegen másele Yntymaqtastyq jónindegi úkimetaralyq komıssııa tarapynan qarastyrylmaq», deıdi Batys Qazaqstan oblysynyń ákimi Narıman Tóreǵalıev quttyqtaý sózinde.
О́ńir basshysynyń aıtýynsha, bıylǵy forým «Jumysshy mamandyqtar – ekonomıkany damytatyn qozǵaýshy kúsh» taqyrybyna arnalǵan.
«Bul mamandyqtar ónerkásip, energetıka, kólik jáne logıstıka salalarynyń damýyna serpin berip qana qoımaı, saýda-ekonomıkalyq yntymaqtastyqtyń berik negizin qalyptastyrady», deıdi ákim.
Osyǵan oraı forým aıasynda «Sıfrlyq ekonomıka jáne jasandy ıntellekt: tehnologııalyq serpilis úshin mamandar daıarlaý», «Energetıka jáne ónerkásip: jańa ekonomıkaǵa qajetti jańa quzyretter», «Kólik jáne logıstıka – jumysshy kadrlar tranzıttik ekonomıkany damytatyn qozǵaýshy kúsh», «Kólik jáne logıstıka – jumysshy kadrlar tranzıttik ekonomıkany damytatyn qozǵaýshy kúsh» sekildi taqyryptar barynsha talqylanbaq.
Halyqaralyq jıynǵa Oqý-aǵartý mınıstrligi Tehnıkalyq jáne kásiptik bilim departamentiniń dırektory Áset Muhanbetov, «M.Tynyshpaev atyndaǵy ALT University» ýnıversıteti, Seıfýllın atyndaǵy QazATZÝ, Jáńgir han atyndaǵy Batys Qazaqstan agrarlyq-tehnıkalyq ýnıversıteti, Astana IT University, Pavlodar qalasy Aqparattyq tehnologııalar kolledji, basqa da tanymal bilim ordalarynyń basshylary, Reseı jaǵynan Reseı Sıfrlyq mınıstrligi Jasandy ıntellekt jáne aýqymdy derekterdi damytý departamentiniń dırektory Sergeı Sergıenko, Razýmovskıı atyndaǵy Saratov memlekettik medısına ýnıversıteti, Iý.A. Gagarın atyndaǵy Saratov memlekettik tehnıkalyq ýnıversıtetiniń Qoldanbaly aqparattyq tehnologııalar jáne kommýnıkasııalar ınstıtýty, ózge de JOO basshylary qatysyp jatyr.
О́ńiraralyq yntymaqtastyq forýmy aıasynda eki eldiń erikti jastary da bas qosyp, yntymaqtastyq máselesin talqylady. Jıynǵa Reseı Federasııasynan jastar delegasııasy, Qazaqstannyń Astana, Almaty, Shymkent qalalary men oblystarynan jınalǵan jas kóshbasshylar kelgen.
Forýmnyń basty maqsaty – Qazaqstan men Reseı arasyndaǵy tatý kórshilik pen ózara senimdi nyǵaıtý, óńirler arasyndaǵy áleýmettik, ekonomıkalyq, mádenı jáne gýmanıtarlyq baılanystardy tereńdetý. Sonymen qatar jastardyń, kásipkerler men azamattyq qoǵam ókilderiniń belsendi yntymaqtastyǵyn damytýǵa baǵyttalǵan.
«Jastar úshin jumysshy mamandyqtardyń tartymdylyǵy men úrdisteri» jáne «Volonterlik qyzmet salasyndaǵy tájirıbe almasý: Jaqsy kórshilik» atty qos seksııada eki eldiń eńbek naryǵyndaǵy úrdister, kásipkerlik belsendilikti arttyrý joldary, ekologııalyq jaýapkershilik pen volonterlik mádenıetti damytýdyń tıimdi tásilderi talqylandy.
Qazaqstan men Reseı arasyndaǵy óńiraralyq yntymaqtastyq forýmy bıyl on birinshi márte ótip jatsa, Qazaqstan-Reseı iskerlik keńesi qurylǵanyna bıyl mereıli 10 jyl bolǵan eken.
«Batys Qazaqstan oblysy Eýropa men Azııanyń qıylysynda ornalasqan, Qazaqstannyń ortalyq jáne ońtústik aımaǵy, sondaı-aq Ortalyq Azııa elderi úshin batys qaqpa deýge bolady. Oral qalasy – Eýropada ornalasqan Qazaqstandaǵy jalǵyz qala. Batys Qazaqstan oblysy Reseı Federasııasynyń bes óńirimen: Orynbor, Samara, Saratov, Volgograd jáne Astrahan oblysymen shektesedi. Sondyqtan Aqjaıyq óńiri kóp jyl boıy eki eldiń ekonomıkalyq múddesin baılanystyratyn jáne shekaralas aımaqtardyń turaqty damýyn qamtamasyz etetin mańyzdy kópirge aınaldy. 2025 jyldyń qańtar-tamyz aılarynda Batys Qazaqstan oblysy men Reseı Federasııasy arasyndaǵy syrtqy saýda aınalymy 504,4 mıllıon dollarǵa jetti. 2024 jyldyń sáıkes kezeńimen salystyrǵanda 9,8%-ǵa óskeni kórinip tur», deıdi Batys Qazaqstan oblysynyń Kásipkerler palatasy óńirlik keńesiniń tóraǵasy Murat Jákibaev.
Batys Qazaqstan oblysy – elimizdiń damyǵan ındýstrııaldy-agrarlyq óńirleriniń biri. О́ńirde 2025-2030 jyldary jalpy quny shamamen 2,2 trln teńgege teń 70-ten astam jobany júzege asyrý josparlanyp otyr. Bul 9 myńnan asa jańa jumys ornyn ashýǵa múmkindik beredi. Oblys aýmaǵynda álemdegi eń iri munaı, gaz jáne gaz kondensaty ken orny – Qarashyǵanaq ornalasqan.
Batys Qazaqstan oblysy
