Foto: kolesa.kz
Atalǵan máseleni Bolatbek Álıev Facebook-taǵy paraqshasynda kóterdi.
Bul shekteý buryn bolǵan, biraq bılik 2019 jyly ony tıimdi emes jáne qoldanýǵa jaramsyz dep tanyp, kúshin joıǵan edi. Biraq 2022 jyly bul tyıymdy qaıta engizdi, biraq 2026 jylǵa deıin keıinge qaldyrdy.
«Tyıym joldy qorǵaý úshin qajet sııaqty kórinedi. Is júzinde ol kásibı emes jáne buryn óz tıimsizdigin kórsetken sheshim», deıdi B.Álıev.
Depýtattyń aıtýynsha Qazaqstanǵa kiretin ár júk kóligi sertıfıkat alady. Demek memleket tehnıkany standartqa saı dep tanyp, paıdalanýǵa ruqsat beredi. Bılik mundaı mashınaǵa tyıym salsa, bul retteý emes, óz sheshiminen bas tartý bolady. Memleket 2022 jyldan keıin shekteýdi qaıta engizetinin bildi, sol kezde sertıfıkat berý rásimin qaıta qarap, myńdaǵan tehnıkanyń kirýine jol bermeı, sodan keıin ǵana paıdalanýǵa tyıym salýy kerek edi.
Júkkótergishtigi 25 tonnadan asatyn ári júkti ózi túsiretin úsh osti kólikter – jolda kóp kezdesetin HOWO, Shacman, XCMG, Dongfeng ónimderi.
Bolatbek Álıev tyıymnyń tek júkti ózi túsiretin kólikke qatysty bolýy qısynsyz deıdi. Sebebi úsh osti shassı búginde beton aralastyrǵysh, konteıner tasyǵysh, astyq tasyǵysh jáne borttyq júk kólikte bar. Tehnıkalyq turǵyda bular bir avtomobıl. Biraq nege ekeni belgisiz, tyıym tek júkti ózi túsiretin kólikke qatysty.
«Joldar buzylyp jatsa, oǵan shanaq emes, sapasyz qurylys pen baqylaý júıesiniń álsizdigi kináli. Bizde ostik júkteme normasy (8-10 tonna), salmaq ólsheý júıesi jáne kólik ınspeksııasy bar. Baqylaý jumys istemese, ony qaıta iske qosý kerek, avtomobıl klasyna tyıym salý durys sheshim emes. Ákimshilik tártip ornatýdyń ornyna tasymaldaýshylardy kinálaý ońaı», dedi Májilis depýtaty.
Ol qazir elde shamamen 36 500 júkti ózi túsiretin úsh osti kólik bar deıdi. Bılik olarǵa tyıym salsa, ondaǵan myń adam jumyssyz qalady, ondaǵan myń otbasy zardap shegedi. Bul mashınalar kóptegen salada jumys isteıdi. Shekteý ekonomıkadaǵy birneshe sektordyń jumysyn toqtatyp, tehnıka tapshylyǵyn týǵyzady, shyǵyn artyp, memlekettik jobalardyń aıaqtalýyna tosqaýyl bolady.
Bolatbek Álıev júkti ózi túsiretin úsh osti kólikke qatysty tyıymdy alyp tastap, «Avtomobıl kóligi týraly» zańnyń 38-2-babyn túzetýdi jáne ostik júktemeni baqylaý prosessin kúsheıtýdi usyndy.
