Eski kólikti qabyldap, qaıta óńdeý byltyr jeltoqsanda bastalýy kerek edi. Sol kezde jańa kólik alý úshin beriletin jeńildik sertıfıkatynyń quny belgili boldy:
- jeńil kólik — 315 000 teńge;
- mıkroavtobýs — 550 000 teńge;
- avtobýs — 750 000 teńge;
- salmaǵy 12 tonnadan aspaıtyn júk kóligi — 550 000 teńge;
- aýyr júk kólikteri — 750 000 teńge;
- traktor — 560 000 — 1 mln teńge;
- kombaın — 1.5 — 2 mln teńge.
2025 jyl aıaqtalaıyn dep qaldy, kompanııalar men jeke tulǵalar ýtıl alymyn tólep keledi, biraq isten shyqqan kólikterdi qabyldaý jáne qaıta óńdeý áli bastalǵan joq. Nege?
Vedomstvo kásipkerler qoldanystan shyqqan avtomobıl men aýylsharýashylyq tehnıkasyn qaıta óńdeýge «Jasyl damý» AQ-ǵa bar-joǵy úsh ótinim jibergen dep jaýap berdi. Operator olardy qujaty durys emes dep qabyldamaǵan. Mınıstrliktiń málimetinshe «Jasyl damý» ázirge «qaıta óńdeýshilerdi iriktep jatyr», ıaǵnı ótinim qabyldap jatyr. Biraq kásipkerler ýtılızasııamen aınalysqysy kelmeıtindeı kórinedi. Sondyqtan mashına qabyldap, qaıta óńdeıtin zaýyttar naqty qashan iske qosylatyny belgisiz.
Mamandar sertıfıkattyń naqty qunyn áli bekitpedi. Ekologııa mınıstrligi ókilderiniń aıtýynsha baǵany jyl saıyn naqty esepteý úshin О́nerkásip mınıstrliginiń ındýstrııalyq qyzmetti qoldaý bólimi 2025 jylǵa arnalǵan josparyn usynýy kerek edi. Biraq ony istemepti. 2026 jylǵa arnalǵan jospardy da jarııalamady.
Soǵan qaraǵanda, bıyl kólik qabyldanbaıtyn sııaqty. Prosess 2026 jyly bastala ma, úlken suraq.
«Jasyl damý» AQ-nyń qarjylyq esebine sáıkes byltyr halyq 328 978 kólik pen aýylsharýashylyq tehnıkasy úshin ýtıl alymyn tólegen. Kólik quralyn óndirý men ımporttan túsken ýtıl alymynyń mólsheri 269 mlrd 593 mln teńgeni qurady. Onyń ishinde 122.7 mlrd teńge Qazaqstanda mashına qurastyratyn kásiporyndarǵa 139 444 avtomobıl men aýylsharýashylyq tehnıkasyn shyǵarýǵa jumsaldy.
