Bul sheshim búgin elorda máslıhatynyń sessııasynda qabyldandy. Tıisti usynysty Astana qalasy Tilderdi damytý jáne arhıv isi basqarmasynyń basshysy Sáken Esirkep jarııalady.
«Jýyrda, qyrkúıek aıynda, elimizge Italııa prezıdenti resmı saparmen keldi. Osy kezdesý barysynda Memleket basshysy Astanadaǵy ortalyq kóshelerdiń birine Marko Polonyń atyn berýdi tapsyrǵan bolatyn», dedi ol.
Marko Polonyń esimi beriletin kóshe Turan jáne Qabanbaı batyr dańǵyldaryn jalǵaıtyn ýchaskede ornalasqan.
Sáken Esirkeptiń aıtýynsha, áıgili saıahatshy Marko Polo (XIII–XIV ǵǵ.) Eýrazııa halyqtarynyń tarıhyn zertteýge zor úles qosqan jáne qazirgi Qazaqstan aýmaǵyn mekendegen ata-babalarymyz týraly qundy derekter qaldyrǵan.
«Ol Jerorta teńizinen Qytaıǵa deıingi uzaq sapar shegip, jol boıyndaǵy elderdiń turmys-tirshiligin egjeı-tegjeıli sıpattaǵan. Onyń jazbalarynda qypshaqtar, túrkiler jáne Altyn Orda týraly mańyzdy málimetter bar», dedi ol.
Budan bólek, mádenı yntymaqtastyq aıasynda Qazaqstan men Italııa arasyndaǵy baılanys nyǵaıyp kele jatqany aıtyldy.
«Jaqynda Italııa astanasy – Rımde, Vılla Grasıolı saıabaǵynda uly qazaq aqyny Abaıdyń bıýsti resmı túrde ashyldy», dedi Sáken Esirkep.
Sonymen qatar, Astanada taǵy eki kóshege ataý berý usynyldy:
-
E15 kóshesine — Muhammed Alı Djınna;
-
E754 kóshesine — Sofııa ataýy beriledi.
