Qazaqstan Prezıdenti atalǵan sapar eki el arasyndaǵy strategııalyq seriktestik pen odaqtastyq qarym-qatynasty odan ári nyǵaıtý turǵysynan asa mańyzdy dep sanaıdy.
«Búgin qol jetkizilgen ýaǵdalastyqtar elderimiz arasyndaǵy san qyrly yntymaqtastyqtyń tabysty damyp kele jatqanyn tolyq kórsetedi. Bul biregeı yqpaldastyq óz baǵytynan aınymaıdy.
Meniń oıymsha, postkeńestik keńistiktegi eki jetekshi memleket arasynda ornaǵan jan-jaqty baılanystyń aýqymy, shyn máninde, eýrazııalyq qaýipsizdik júıesiniń mańyzdy elementine aınaldy. Bul tujyrymdamany birqatar múddeli memleket talqylap, zerdeleýde.
Eń bastysy, bizdi ǵasyrlardan tamyr tartatyn baı tarıhymyz, belsendi mádenı-rýhanı baılanystarymyz, ortaq qundylyqtarymyz, zamanaýı syn-qaterlerge qatysty uqsas kózqarasymyz ben bolashaqqa baǵdarymyz biriktiredi. Osyndaı berik negizge qurylǵan strategııalyq seriktestigimiz barlyq baǵytta qarqyndy damyp keledi.
Bıyl memleketterimiz úshin máni zor birqatar mereıtoılyq data atalyp ótti. Biz Uly Otan soǵysyndaǵy Jeńistiń 80 jyldyǵyn laıyqty deńgeıde merekeledik. Osylaısha, Otandy qorǵaý jáne Uly Jeńiske jetý jolynda álem tarıhynda buryn-sońdy bolmaǵan birliktiń úlgisin pash etken naǵyz batyrlar men patrıottardy eske alyp, qurmet kórsettik.
Áıgili Baıqońyr ǵarysh aılaǵynyń 70 jyldyǵy da aıtýly oqıǵa boldy. Bul – ǵaryshty ıgerý isinde uzaq jyldar boıy ǵylymı-tehnıkalyq yntymaqtastyǵymyzdy tanytyp kele jatqan biregeı joba.
Qazaqstan-Reseı memlekettik shekarasy týraly sharttyń 20 jyldyǵy – mańyzdy meje. Bizdiń qurlyq arqyly ótetin álemdegi eń uzyn shekaramyz – tatý kórshiliktiń jarqyn sımvoly», - dedi Memleket basshysy.
Qasym-Jomart Toqaev Qazaqstan men Reseıdiń qarym-qatynasyn jan-jaqty strategııalyq seriktestik pen odaqtastyq deńgeıine jetkizý jónindegi deklarasııa týraly pikir bildirdi.
«Bul qujattyń tarıhı máni zor. Halyqtarymyz arasyndaǵy myzǵymas ózara senim men yntymaqtastyqtyń keleshegi kemel ekenin kórsetedi.
Osy oraıda ekijaqty baılanysty nyǵaıtýǵa eleýli úles qosqany úshin Vladımır Vladımırovıch Pýtınge shynaıy rızashylyǵymdy bildiremin.
Qazaqstandyqtar Reseı Prezıdentin jahandyq aýqymdaǵy memleket qaıratkeri dep biledi ári qurmetteıdi. Onyń esimi álemge jaqsy málim jáne qazirgi almaǵaıyp zamanda orys halqy men Reseı memleketiniń múddesin qorǵaý isinde senim men qajymas qaırattyń sımvoly retinde qabyldanady.
Qazaqstan Reseı Federasııasynyń órkendeýine shyn máninde múddeli. Búgingi kelissózder nátıjesin joǵary baǵalaımyn. Kezdesýimiz ashyq ári senimdi ráýishte ótti jáne naqty paıdasyn berdi», - dedi Qazaqstan basshysy.
Prezıdent barlyq deńgeıde qarqyndy dıalogty qoldaýǵa ýaǵdalasqanyn jetkizdi.
«О́nerkásip, energetıka, kólik-logıstıka, aýyl sharýashylyǵy, joǵary tehnologııalar, sıfrlandyrý, gýmanıtarlyq yqpaldastyq, sondaı-aq jańa ınfraqurylymdyq jobalardy júzege asyrý máselelerine basa mán berdik.
Kúrdeli halyqaralyq ahýalǵa qaramastan yntymaqtastyǵymyz halyqtarymyzdyń ıgiligi jolynda belsendi damyp kele jatqanyna kóńilimiz tolatynyn atap óttik», - dedi Prezıdent.
Qasym-Jomart Toqaev Reseıdi Qazaqstannyń mańyzdy saýda-ekonomıkalyq jáne ınvestısııalyq seriktesi dep atady.
Negizgi kórsetkishter:
2024 jyldyń qortyndysy boıynsha taýar aınalymy shamamen 28 mıllıard dollardy, al bıylǵy 8 aıda 17 mıllıard dollardan asty.
Mindet – ekijaqty saýda kólemin 30 mıllıard dollarǵa deıin jetkizý.
Reseıden Qazaqstan ekonomıkasyna quıylǵan tikeleı ınvestısııa kólemi 27 mıllıard dollardan asty.
2024 jyly Reseıdiń salǵan kapıtal kólemi rekordtyq 4 mıllıard dollarǵa deıin ósip, elimizdiń iri ınvestoryna aınaldy.
Qazaqstannyń Reseıge quıǵan ınvestısııasy da artyp, 15 jylda shamamen 9 mıllıard dollarǵa jetti.
Qazaqstanda reseılikterdiń qatysýymen 20 myńnan asa kompanııa jumys isteıdi Bul – elimizde qyzmet etetin sheteldik kapıtaly bar kásiporyndardyń jartysyna jýyǵy.
175 birlesken joba júzege asyrylýda.
Taraptar iskerlik baılanystardyń joǵary deńgeıin odan ári qoldaýǵa jáne bıznes júrgizýge qajetti jaǵdaı jasaýǵa ýaǵdalasty.
Osy maqsatta Ekonomıkalyq yntymaqtastyqtyń 2030 jylǵa deıingi keshendi baǵdarlamasy qabyldandy.
