Sýret: 018.kz
Bıyl 274 sarbaz Otan aldynda adal qyzmet etýge sert berip, shekara kúzetine resmı túrde kiristi. Sarbazdar sap túzep, áskerı jarǵyǵa saı ant berýi – olardyń azamattyq ári ásker jolyndaǵy eń jaýapty da mártebeli mindetteriniń biri. Saltanatty rásimniń ashylýynda eń birinshi bolyp oblystyq UQK Shekara qyzmeti departamentiniń basshysy, polkovnık Ashat Ahmetov quttyqtaý sóz sóıledi. Ol jas sarbazdardyń ant berý rásimi mańyzdy ekenin jetkizdi.
«Otan – ár azamattyń júregindegi eń qasıetti uǵym. Ant – sol qasıetti uǵymnyń aıǵaǵy. Sizder elimizdiń shekarasyn qorǵaý jolynda berik, batyl jáne adal bolasyzdar dep senemiz. Qadamdaryńyz nyq, qyzmetterińiz abyroıly bolsyn!», dedi Ashat Bolatuly.
Is-shara barysynda Maqanshy aýdanynyń ákimi Dáýren Qoıgeldın de sóz sóılep, jas sarbazdardy ant berý rásimimen quttyqtady. Ol shekara qyzmetindegi jaýapkershilik pen el tynyshtyǵyn saqtaý jolyndaǵy erlik mánine toqtalyp, áskerı boryshty abyroımen atqarýǵa tilektestik bildirdi.
Saltanatty jıynda Áskerı polısııa basqarmasynyń basshysy, polkovnık Muratbek Tileýlıev jas sarbazdardy tártip pen tabandylyqqa shaqyrdy. Sonymen qatar «Zastava tarlandary» respýblıkalyq qoǵamdyq birlestiginiń múshesi, zapastaǵy polkovnık Arman Káribjanov shekara qyzmetiniń tarıhı mańyzyna toqtalyp, babalardan jalǵasqan qaharmandyq dástúrdiń búgingi býynǵa júktegen senimi úlken ekenin jetkizdi. Al «Analardyń júregi» sarbaz analary keńesiniń Abaı oblysyndaǵy ókili Marfýǵa Shaımuratqyzy jas sarbazdarǵa analyq aq batasyn arnap, olardyń abyroıly qyzmetin atqaryp, otbasyna aman-esen oralýyna tilektes ekenin aıtty. Sonymen qatar Tájik-Aýǵan shekarasyndaǵy áskerı qaqtyǵys ardagerleri respýblıkalyq qoǵamdyq birlestiginiń keńes tóraǵasy Nurbolat Jolbolatuly da óz quttyqtaýyn aıtyp, jas sarbazdarǵa qajyr-qaırat pen erik-jiger tiledi. Ol óz býynynyń kúrdeli kezeńin eske ala otyryp, Otan qorǵaýdyń eshqashan mańyzyn joımaıtyn qasıetti mindet ekenin jetkizdi.
Saltanatty rásim patrıottyq ándermen árlendi. Memlekettik tý kóterilip, eldik rýh asqaqtady. Ant berý rásiminen keıin sarbazdar bólimsheniń aýmaǵymen tanysyp, alǵashqy nusqaýlyqtaryn aldy. Osy sátten bastap olardyń naǵyz áskerı ómiri bastaldy.
Abaı oblysy,
Maqanshy aýdany
