foto: Astana qalasy ákimdigi
«Kúıgenjar» beketinde polıseıler BMW kóligin toqtatyp, tekserý júrgizdi. Tekserý kezinde qyzmettik ıt – Baıkal kólik salonynda tyıym salynǵan zat bar ekenin sezip, belgi berdi.
Bar bolǵany bes mınýttyń ishinde ıttiń qyraǵylyǵynyń arqasynda polıseıler avtokólikten esirtkige uqsas zat – gashısh tárkiledi. Oqıǵa ornynda 33 jastaǵy kúdikti azamat esirtki zattaryn saqtaý faktisi boıynsha ustaldy.
Atalǵan derek boıynsha sotqa deıingi tergeý amaldary bastaldy. Astana qalasy polısııa departamentiniń kınologııalyq qyzmet ortalyǵynda qazirgi tańda 50-den astam qyzmettik ıt bar. Olardyń basym bóligi esirtki men jarylǵysh zattardy izdeýge, iz kesýge jáne qylmys izderin anyqtaýǵa beıimdelgen.
Baıkal esimdi ıt – rotveıler tuqymyna jatady. Ol 4 jyldan beri polısııa qatarynda. Negizgi mindeti – esirtki zattaryn izdeý. Baıkal ıis sezýdi oıyn tásili arqyly úırengen, jáne óziniń dáldigi men tabandylyǵy arqyly birneshe qylmystyń ashylýyna úles qosqan.
Polısııa azamattardy zańsyz esirtki aınalymyna qarsy kúreske beıjaı qaramaýǵa, kúdikti derekter týraly dereý polısııaǵa habarlaýǵa shaqyrady.
