Baǵdarlama aıasynda kórermenge qazirgi qazaq kınoındýstrııasynyń tańdaýly týyndylary usynyldy. Atap aıtsaq, «Jambyl. Jańa dáýir» tarıhı fılmi, prokatta bir mıllıard teńgeden astam tabys jınaǵan «Qaitadan» dramasy, 2024 jylǵy Paralımpıada oıyndarynyń kúmis júldegeri Erǵalı Shámeev týraly qysqametrajdy «Úmit sáýlesi», sondaı-aq ómirindegi qıyndyqtardy eńbek pen jigerdiń kúshimen eńsergen kókparshy qyz Eva Jıgalınanyń ómiri negizinde túsirilgen «Eva – batyr qyz» kórkem týyndysy. Ár fılm ózbek kórermeniniń ystyq yqylasyna bólenip, týyndylardyń mazmuny men kóterilgen taqyryptary joǵary baǵalandy.
«Jambyl. Jańa dáýir» fılmi kórsetilimine О́zbekstan Kınoagenttiginiń dırektory Shýhrat Rızaev arnaıy qatysty. Ol rejısser Jandos Qusaıynovtyń eńbegin baǵalap, onyń kásibı sheberligin atap ótti. Sonymen qatar ol rejısserdi Qazaqstan men О́zbekstannyń aldaǵy birlesken jobalaryna qatysýǵa shaqyrdy.
Halyqaralyq kongress baǵdarlamasy aıasynda qazaq rejısserleri «О́zbekfılm» stýdııasynyń pavılondaryn aralady. Aıta ketý kerek, stýdııada túrki jáne arab kıimderinen bastap túrli saýyttarǵa deıingi rekvızıt pen kostıým kolleksııasy bar. Bul tarıhı janrdaǵy jobalar úshin aıryqsha qyzyǵýshylyq týdyrdy. Mundaı jumys saparlary mamandarǵa birlesken jobalardyń egjeı-tegjeıin talqylaýǵa, tájirıbe almasýǵa, kásibı baılanystardy nyǵaıtýǵa múmkindik beredi.
Osy arqyly elder arasyndaǵy mádenı yntymaqtastyqtyń jańa kókjıekteri ashylady.
Sonymen birge kongress aıasynda Qazaqstan, Ázerbaıjan, Qyrǵyzstan, Tájikstan, Túrikmenstan jáne О́zbekstan kıno uıymdarynyń basshylary qatysqan dóńgelek ústel ótti. Taraptar ár el arasyndaǵy yntymaqtastyqty keńeıtý, birlesken kınojobalardyń áleýeti, ulttyq kınony halyqaralyq deńgeıde damytý, kınoóner arqyly gýmanıtarlyq baılanysty nyǵaıtý máselelerin talqylady.
Jıynda kıno salasyna qolaıly jaǵdaı jasaýǵa, kásibı tájirıbe almasýǵa Ortalyq Azııa elderi men Ázerbaıjan arasyndaǵy mádenı dıalogti damytý baǵyttaryna erekshe nazar aýdaryldy.
