Foto: Pixabay.com
Kelissóz barysynda taraptar elektr kólikteri, zarıadtaý ınfraqurylymy jáne turaqty mobıldik salasyndaǵy jobalardy Qazaqstanda iske asyrý perspektıvalaryn, sondaı-aq GSM kompanııasynyń aımaqtyq ókildigin Almaty qalasynda ashý múmkindigin talqylady. Atalǵan ókildik kompanııanyń TMD keńistigindegi qyzmetin úılestirý ortalyǵy bolmaq.
VinGroup quramyndaǵy GSM kompanııasy Ońtústik-Shyǵys Azııadaǵy eń iri elektr kóligi platformasy. Xanh SM brendimen ol 12 mıllıonnan astam klıentke qyzmet kórsetedi, shamamen 100 myń elektr kóligin paıdalanady, Vetnam taksı naryǵynyń 40% úlesine ıe jáne aımaq elderinde óz qatysýyn keńeıtip jatyr.
Invest.gov.kz málimetinshe Qazaqstanda VinGroup VinFast elektr kólikterin paıdalaný arqyly jolaýshylar tasymaly qyzmetin iske qosý, elektr kólikterine arnalǵan zarıadtaý stansııalarynyń jelisin qurý, sondaı-aq servıstik jáne óndiristik qýattardy jergiliktendirý múmkindikterin qarastyryp jatyr. Budan bólek, kompanııa bilim berý, medısına, development jáne smart-qalalar ınfraqurylymyn damytý salalaryndaǵy jobalarǵa qatysýǵa múddelilik bildirdi.
Madııar Sultanbek VinGroup bastamasy Qazaqstannyń «jasyl» ekonomıka men ekologııalyq kólik ınfraqurylymyn damytý strategııasyna sáıkes keletinin atap ótip, «Kazakh invest» kompanııasynyń jobalardy júzege asyrýdyń barlyq kezeńderinde keshendi qoldaý kórsetýge daıyn ekenin jetkizdi:
«Elektr kólikteri men zarıadtaý ınfraqurylymyn damytý – ekonomıkany ekologııalyq jańǵyrtýdyń basty baǵyttarynyń biri. Biz VinGroup kompanııasynyń tehnologııalardy jergiliktendirýge degen qyzyǵýshylyǵyn joǵary baǵalaımyz jáne jobany iske qosý máselelerin jan-jaqty pysyqtaýǵa daıynbyz», dedi ol.
Kezdesý qorytyndysynda taraptar jobalyq bastamalardy birlesip ázirleýdi jalǵastyrýǵa jáne elektrlik mobıldik, sıfrlyq tehnologııalar men turaqty damý salalaryndaǵy naqty yntymaqtastyq baǵyttaryn aıqyndaýǵa ýaǵdalasty.
