Taıaýda jas kombaınshy aýyl sharýashylyǵy eńbekkerleriniń ekinshi forýmynda Memleket basshysy Qasym-Jomart Toqaevtyń Jarlyǵymen «Eren eńbegi úshin» medalimen marapattaldy.
El ıgiligin eseleýge úles qosqan Dıas Ábjanuly «Fırma Almaz-Agro» seriktestiginde úshinshi jyl eńbek etedi. Orta arnaýly bilimi bar. Kóptegen aýyl balalary tárizdi tehnıkaǵa degen qumarlyq erte paıda bolǵan. Aldyńǵy tolqyn aǵalarynyń jan aıamaı jumys istep júrgenin kórip, ózi de naq solardaı bolýǵa tyrysqan. Asylynda aldynan jumys úrkip otyratyn eńbekqor adamdardyń is-qımyly keıingi tolqynǵa ádemi ónege.
«Bizde ozat jumysshylar óte kóp. Olar ózderine tapsyrylǵan kez kelgen sharýany tap-tuınaqtaı etip oryndaıdy jáne mehanızatorlardyń kópshiligi tehnıkanyń barlyq túrin tizgindep, jumys isteı beredi. Al kombaında isteý qyzyq ári qasterli. Kóz aldyńyzǵa elestetip kórińizshi, kúzgi dala, masaqtaǵy dánin ázer kóterip turǵan egin alqaby. Sál ǵana jel kóterilse teńizdeı tolqıdy. Yrys tunǵan, mol dáýletke bókken jomart jer. Eger egistik alqabynda bir tal aramshóp bolmasa toqtamaı shaba bergiń keledi. Qazirgi bizdiń kórsetkishterimizge aǵa tolqynnyń sál tańyrqap qaraıtyny bar. Onyń syry belgili. Jańa zamanǵy qýatty tehnıkalardyń eńbek ónimdiligi óte joǵary», deıdi Dıas Ábjanuly.
Jańaturmys aýylynyń mańy qarbalasy kóp qońyr kúzde eńbek jyryn shertip turady. Darhan dalany adam kóńilin elegizetin eńbek áýeni terbetken kezde sol joryqqa qatysqan erlerdiń de eńsesi kóterile túsedi.
«Ujym óte uıymshyl. Ár sáti sheshýshi shaqqa aınalǵan kóktemgi egis, kúzgi egin oraǵy kezinde ýaqytpen sanaspaı eńbek etemiz. Mynaý seniń, mynaý meniń jumysym deý joq, bári ortaq. Seriktestik eńbek etýimizge jaqsy jaǵdaı jasap otyr. Eńbekaqymyz tolymdy, ýaqytynda qolymyzǵa tıedi», deıdi jas kombaınshy.
Jıyrmadan jańa asqan jas jigittiń el ishinde abyroıǵa bólenýi adal eńbeginiń arqasynda deýimiz kerek. Alda qanshama ǵumyr bar. Sol jolda qos qolytyǵynan kóterip demeıtin, alǵa umtyldyratyn qudiret – óziniń boıyndaǵy adal eńbekke degen umtylysy.
