Joldyń ashylý rásiminde qozǵalysty bastaý batyrmasy basylyp, jańa jol arqyly alǵashqy bolyp 15 kólikten turatyn avtokolonna saltanatpen júrip ótti.
«Bıyl biz el boıynsha 13 myń shaqyrym jolda jóndeý men qaıta jańartý jumystaryn júrgizý arqyly rekordtyq nátıjege qol jetkizdik. Bul – Memleket basshysynyń qoldaýy men jol salasy qyzmetkerleriniń kúndelikti atqaryp júrgen eren eńbeginiń arqasy. Olar azamattar úshin qaýipsiz, ári yńǵaıly joldar salyp, óńirlerdiń damýyna jańa múmkindikter ashyp jatyr», dedi is-shara barysynda Kólik vıse-mınıstri Maqsat Qalıaqparov.
Buǵan qosa, joldy ashý saltanatynyń aıasynda jobany iske asyrýǵa erekshe úles qosqan jumysshylar marapattaldy. Olarǵa vedomstvolyq medaldar, Alǵys hattar men Kólik mınıstrliginiń Qurmet gramotalary tabystaldy.
Jańa ashylǵan «Uzynaǵash – Otar» kúre jolynda negizgi qurylys-montaj jumystary ótken jyly bastalyp, nebári eki jylda tolyq aıaqtaldy. Jobaǵa 163 birlik tehnıka, 290 maman jumyldyrylyp, eki asfalt-beton zaýyty men tórt jol-qurylys basqarmasy jumys istedi.
42 shaqyrymdyq «Uzynaǵash – Otar» tasjolynyń ashylýy magıstraldiń ótkizý qabiletin arttyryp, jol júrý ýaqytyn qysqartady, qozǵalys qaýipsizdigin jaqsartady ári óńirler arasyndaǵy kólik baılanystaryn nyǵaıtady. Sonymen birge, Ortalyq Azııa memleketterimen ekonomıkalyq qatynastardy odan ári kúsheıtpek.
