17 qarasha kúni oblys aýmaǵyndaǵy Chapaı – Jańaqala – Saıhyn baǵytyndaǵy tasjolda bolǵan jol apatynan 8 adam qaza taýyp, 4 adam túrli dárejedegi jaraqatymen aýrýhanaǵa túskenin budan buryn habarlaǵan bolatynbyz.
Úkimet tapsyrmasyna sáıkes qurylǵan jumys toby Jańaqala aýdanynda bolǵan jol-kólik oqıǵasyna baılanysty onyń mán-jaıyn tolyq ári ádil anyqtap, zardap shekkenderge qajetti kómek kórsetýdi uıymdastyrýy tıis. Sondaı-aq quzyretti organdar apat sebebi men mán-jaıyna taldaý júrgizedi. Komıssııa quramyna oblys prokýrory, oblystyq polısııa departamenti, tótenshe jaǵdaılar departamenti jáne salalyq basqarmalar basshylary, Jańaqala aýdanynyń ákimi engizildi.
«Bul – búkil óńirimiz úshin óte ókinishti jaǵdaı. Aýyr qaza qanshama otbasyna orny tolmas qaıǵy ákeldi. Zardap shekkenderge tıisti medısınalyq járdem beriledi, al qaza tapqandardyń otbasyna zań aıasynda kómek kórsetiledi», dedi oblys ákimi Narıman Tóreǵalıev.
Jańaqala aýdanynyń ákimine qaza tapqan jandardyń jerleý rásimin uıymdastyrý, sondaı-aq zardap shekkender men qaza tapqandardyń otbasyna barlyq qajetti medısınalyq jáne psıhologııalyq kómek kórsetý tapsyryldy.
Oqıǵa 17 qarasha kúni Chapaı – Jańaqala – Saıhyn baǵytyndaǵy tasjoldyń 50-shaqyrymynda bolǵan. Toyota Camry jáne Volkswagen Sharan avtokólikteri soqtyǵysyp, Sharan órtke oranǵan. Oqıǵa ornynda 8 adam qaza taýyp, 4 adam Aqjaıyq aýdandyq aýrýhanasyna jetkizildi.
Qaza tapqan azamattar Jańaqala aýdanynyń Muqyr, Jańaqala, Qyzyloba, Máshteksaı aýyldarynyń jáne Qaratóbe aýdanynyń Egindikól aýylynyń turǵyndary. Eki kóliktiń de júrgizýshisi qaıtys bolǵan.
Jol apaty kezinde jaraqat alǵan 4 adamnyń ómirine tóngen qaýip joq, dárigerler turaqty baqylaýda ustap, em sharasyn jasap jatyr.
Aýrýhanaǵa túsken jolaýshylardyń ekeýi – kámeletke tolmaǵan, olar keshe, ıaǵnı 17 qarasha kúni keshki saǵat 21:40-ta oblystyq kópbeıindi balalar aýrýhanasyna jetkizilgen. 1 jasar qyz bala bas-mı jaraqatyn alǵan, mıy shaıqalýyna qosa, sol jaq san súıegi synǵan. Apat kezinde 24 jastaǵy ákesi janynda bolǵan, ol da beli men jambas-san býyny aımaǵyndaǵy jaraqat alǵan, qazir jaǵdaıy qanaǵattanarlyq. Qyzyna kútim jasaý úshin balalar aýrýhanasyna ornalastyrylǵan. Al 2012 jyly týǵan ul balaǵa «jabyq bas-mı jaraqaty, mı shaıqalýy, tóbe aımaǵynyń jumsaq tinderiniń jaraqaty» degen dıagnoz qoıylǵan. Jaraqat alǵan tórtinshi adam – 2002 jyly týǵan boıjetken. Oǵan Aqjaıyq aýdandyq aýrýhanasynda ishki qurylysyna ota jasalǵan. «Jaǵdaıy turaqty» dep habarlady dárigerler.
Qaza tapqandardyń tórteýi – áıel, tórteýi – er adam.
Batys Qazaqstan oblysy
